Тошкент шаҳридаги 3 та АЁҚШда автобензин давлат стандарт талабларига мос келмаслик ҳолати аниқланди. Бу ҳақда “Ўзенергоинспексия” хабар берди.

Қайд этилишича, Вазирлар Маҳкамаси ҳузуридаги “Ўзенергоинспексия” ва Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамкорлигида Тошкент шаҳрида ўтказилган назорат тадбирларида АЁҚШларда қоидабузарлик ҳолатлари аниқланган.

Хусусан, Яшнобод туманида жойлашган “А.О.” ва “О.О.” МЧЖларга қарашли 2 та автомобилларга ёқилғи қуйиш шохобчасида сотилаётган автобензиндан намуна олиниб, лаборатория таҳлилларидан ўтказилганда АИ-80 ва АИ-92-маркали автобензин давлат стандарт талабларига мос келмаслиги (сифатсиз) аниқланган.

Бу каби ҳолат Янгиҳаёт туманида “Ф.Г.С.” МЧЖга қарашли АЁҚШда ҳам нефть маҳсулоти сифатсиз эканлиги маълум бўлган.

Мазкур ҳолатлар юзасидан қоидабузарликка йўл қўйган ушбу АЁҚШларда камчиликлар бартараф этилгунга қадар биржа савдоларида иштирок этиши вақтинча тўхтатилган.

• Бензин
• Тошкент