Тошкентдаги меҳмонхонада россиялик Инесса Паперная ва унинг ҳамроҳи вафот этгани бўйича дастлабки тергов ҳаракатлари якунланиб, иш судга оширилди.

Ушбу ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) ва 229-моддаси (ўзбошимчалик) билан жиноят иши қўзғатилган бўлиб, 4 кишига нисбатан қамоққа олиш эҳтиёт чораси қўлланган.

“Лента” нашри ва “Профиль” журналида ишлаган 47 ёшли Инесса Паперная Ўзбекистонга таътилга келганидан сўнг, 2024 йилнинг 20 октябрида Тошкентдаги Karaman Palace меҳмонхонаси ходимлари Инесса Паперная ва ҳамроҳининг жасадларини ўз хонасида ҳаёт белгиларисиз топганди.

Дастлабки маълумотларга кўра, ўлим бассейн тозалангандан сўнг меҳмонхона вентиляция тизимига тушган газдан заҳарланишдан келиб чиққан. Ҳолат юзасидан жиноят иши қўзғатилиб, ўлим сабабини аниқлаш учун суд-тиббий экспертиза тайинланди. Суд-тиббий экспертиза хулосасига кўра, уларнинг ўлимига ис гази ва водород сульфидидан заҳарланиш сабаб бўлган. Техник экспертиза ўтказилганда меҳмонхонадаги иситиш қозонлари эскиргани ва хизмат муддати тугагани аниқланган.

• O'lim