АҚШ собиқ президенти Дональд Трамп 2 октябрь, душанба куни фирибгарлик бўйича фуқаролик иши юзасидан суд жараёнида шахсан иштирок этди. Манҳеттендаги суд мажлиси бошланишидан олдин у ўзига қарши даъво берган Нью-Йорк бош прокурори Летиция Жеймс ва бир ҳафта олдин уни айбдор деб топган судя Артур Энгоронни қаттиқ қоралади.

Трамп ўзига қўйилган айбловларни “асоссиз”, судя Энгоронни “ёвуз”, афро-америкалик Жеймсни “ирқчи” деб атади. “Бу барча даврлардаги энг катта жодугарлар овининг давоми”, - деди 77 ёшли бизнесмен ва сиёсатчи.

Демократик партия аъзоси Летиция Жеймс ўз даъвосида собиқ Президент, унинг ўғиллари ва етакчи ходимларини кредитлар ва суғурта шартномалари бўйича қулайроқ шартларни олиш учун “Trump Organization” компанияси қийматини йиллар давомида ошириб кўрсатганликда айблади. Унинг сўзларига кўра, суд жараёнида Трампнинг фирибгарликларини тўлиқ фош этиш ниятида. Унинг сўзларига кўра, инсон қанчалик бой ёки нуфузли бўлмасин, қонунлар ҳамма учун бир хил ҳисобланади.

Судя Артур Энгорон 26 сентябрь куни бўлиб ўтган суд жараёнида Трампни фирибгарликда айбдор деб топганидан сўнг, энди суд жараёнида асосан бериладиган жазо чоралари кўрилади.

Собиқ давлат раҳбарини бу фуқаровий даъво бўйича қамоқ жазоси кутмаяпти, бир неча ойга чўзилиши мумкин бўлган суд жараёни унинг навбатдаги президентлик сайловларига номзодлигига таъсир қилмаслиги керак.

Жеймс Трампга 250 миллион доллар жарима солиб, Нью-Йоркда бизнес юритишни тақиқлашни талаб қилмоқда.

• АҚШ
• Nyu-York
• Суд
• Трамп