Anadolu агентлиги хабар беришича, Истанбулда бир кунда 11 киши қалбаки алкоголдан заҳарланиб, қурбон бўлган.

“Истанбулнинг турли шифохоналарига 38 киши қалбаки спиртли ичимликларни истеъмол қилганидан кейин шикоят билан мурожаат қилишди, улардан 26 нафари чет элликлар. Касалхонага ётқизилган 38 кишидан 24 соат ичида 11 киши вафот этди”, – дейилади агентлик хабарида.

Ўзбекистон бош консуллиги хабарига кўра, ҳалок бўлганлар орасида олти нафар (беш нафар эркак ва бир аёл) ўзбекистонликлар бор. Улар Аксарай ҳудудидан сотиб олинган алкоголь маҳсулотини истеъмол қилишган.

Мазкур ҳолатга алоқадорликда айбланиб, 2 нафар Туркманистон фуқароси қўлга олинган ва уларга нисбатан жиноят иши очилган.

Истанбулда спиртли ичимликлар билан заҳарланган одамлар ноябрь ойининг охиридан бошлаб шифохонага мурожаат қила бошлаганлар, 2025 йил бошига келиб камида 37 киши ҳалок бўлган.

Аввалроқ, полиция сохта ичимликни ишлаб чиқариш ва тарқатишда иштирок этганликда гумон қилинган жами 36 кишидан 14 нафарини ҳибсга олган. Мингдан ортиқ савдо марказларида ўтказилган текширувлар мобайнида масъул шахслар 287 тоннадан ортиқ қалбаки спиртли ичимликларни мусодара қилган.

• Aлкогол
• Ўзбекистонлик
• Туркия
• Заҳарланиш
• fuqaro