Аввалроқ Туркиянинг Измир вилоятида вертолёт ҳалокатга учрагани ҳақида хабар берган эдик. Аниқланишича, ушбу вертолёт ичида уч нафар Қирғизистон фуқароси бўлган. Бу ҳақда турк нашрлари ёзмоқда.

Туркия Қишлоқ ва ўрмон хўжалиги вазири Иброҳим Юмаклининг айтишича, Туркиянинг Измир вилоятидаги Мендерес минтақасида ўрмонда ёнғин келиб чиққан. Вертолёт ўрмон ёнғинини ўчириш учун сув олиб кетаётганида Тахтали сув омборига қулаган. Экипажда тўрт киши бўлиб, улардан уч нафари қирғизистонлик, 1 нафари турк бўлган.

Бортдаги тўрт киши орасидан улар иккинчи учувчи бўлиб ишлаётган Қирғизистон фуқаросини қутқариб қолишган. У оғир аҳволда шифохонага етказилган. Ҳозирда ҳалокатга учраган вертолётдаги яна уч кишини қидириш ишлари давом этмоқда.

Маълумот учун, Туркияда Измир вилоятининг Мендерес туманидаги ўрмонда бошланган ёнғин тезда катта ҳудудга тарқалди. Уни ўчиришга 9 та самолёт, 20 та вертолёт, 54 та сув ташиш машинаси, 10 та иш машинаси ва 500 га яқин ўт ўчирувчи жалб қилинган.

Ҳозирча Қирғизистон Ташқи ишлар вазирлиги воқеа ҳақида маълумот бермаган.

• Қирғизистон
• Туркия