Туркияда маҳаллий вақт билан соат 08:00 да президентлик сайловларининг иккинчи турида овоз бериш учун сайлов участкалари очилди.

Мамлакат бўйлаб 191 мингдан ортиқ сайлов қутилари ўрнатилгани айтилмқода. Сайловчилар сони эса 60 миллиондан ошган.

14 май куни овоз беришнинг биринчи тури якунлари бўйича номзодларнинг ҳеч бири 50 фоиз овоз тўпламаган, иккинчи турга чиқиш ҳуқуқини эса “Республика алянси” номзоди, амалдаги президент Ражаб Тоййиб Эрдўғoн (49,52 фоиз овоз) ва “Халқ алянси” номзоди, энг йирик мухолифат Халқ-республика партияси етакчиси Камол Қиличдoрўғлу (44,88 фоиз овоз) олган эди. 

Биринчи турда 5,17 фоиз овоз тўплаган “Ата алянси”нинг собиқ президентликка номзоди Синан Ўған тарафдорларини иккинчи турда Эрдўғoнни қўллаб-қувватлашга чақирган.

Овозларни ҳисоблаш сайлов участкалари ёпилгандан сўнг, маҳаллий вақт билан соат 17:00 да бошланади.

Чет элда яшовчи Туркия фуқаролари учун овоз бериш 24 май куни якунланган. 73 мамлакатда жами 3,5 миллион сайловчи овоз берган.

• Туркия
• saylov