2025 йил 24 апрель куни Ўзбекистон Республикасининг Истанбул шаҳридаги Бош консулхонаси Ўзбекистон Республикаси Вазирлар Маҳкамаси ҳузуридаги Миграция агентлиги билан ҳамкорликда, Истанбул шаҳрида ёнғин оқибатида вафот этган 19 ёшли ўзбекистонликнинг жасадини ватанга қайтарди.

Мазкур фуқаро Истанбул шаҳри Кадикой тумани Фикиртепе мавзесида жойлашган ижарадаги уйда, номаълум сабабларга кўра юзага келган ёнғин оқибатида вафот этган.

Марҳумнинг жасадини Ўзбекистонга юбориш билан боғлиқ барча харажатлар Ўзбекистон Республикаси Вазирлар Маҳкамаси ҳузуридаги Миграция агентлиги томонидан тўлиқ қоплаб берилди.

Шу ўринда, ижтимоий тармоқларда айрим шахслар томонидан марҳумни Ўзбекистонга юбориш учун ёрдам пули йиғилаётгани ҳақидаги ёлғон ва асоссиз маълумотлар тарқатилмоқда. Консулхона фуқароларни бу каби нотўғри хабарларга ишонмасликка ва расмий манбаларга таянишга чақирмоқда.

Бош консулхона янги қабул қилинган Ўзбекистон Республикаси Вазирлар Маҳкамасининг 252-сонли “Ўзбекистон фуқароларини хорижда ташкил этилган тартибда ишга жойлаштириш тизимини янада такомиллаштириш чора-тадбирлари тўғрисида”ги қарорига мувофиқ, эндиликда чет элда бўлган даврида вафот этган Ўзбекистон фуқароларининг жасадини ватанга қайтариш билан боғлиқ харажатлар давлат томонидан қопланишини маълум қилди.

Шунингдек, Бош консулхона марҳумнинг оила аъзоларига чуқур ҳамдардлик билдирган.

• Истанбул
• Konsullik
• Туркия
• fuqaro