Тадқиқотларга кўра, ваксиналар йилига ўртача 4,5 миллион кишининг ҳаётини сақлаб қолишга ёрдам беради. Агар эмлаш воситалари танқислиги муаммоси бартараф этилса, 2030 йилга бориб, бу кўрсаткич яна 30 фоизга ошиши мумкин.

Бироқ охирги йиллар, хусусан, пандемия даврида дунё бўйича аҳолининг ваксиналарга бўлган ишончи пасайиб бормоқда.

Қайд этилишича, ижтимоий сўровда иштирок этган 55 давлатдан 52 тасида уч йил ичида болаларни эмлашга нисбатан жамоатчилик иштиёқи пасайган.

Ҳиндистон, Вьетнам, Хитой давлатларида иммунизасиянинг аҳамиятини юқори, Япония, Жанубий Корея ва Папуа-Янги Гвинеяда эса аксинча паст баҳолашган.

Европа давлатлари ўртасида Португалия, Швесия ва Ирландия аҳолисининг ваксиналарга ишончи баланд. Хорватия, Латвия ва Россияда эса бунинг акси кузатилган.

Шунга қарамай, болалар соғлиги учун ваксиналар зарур, деб ҳисобловчилар қатлами 80 фоиздан юқори бўлиб чиққан.

Ҳисоботда келтирилишича, 2019–2021 йиллар давомида 48 миллион нафар ўғил-қиз юқумли касалликларга қарши ваксина олмаган. 19 миллион бола эса тўлиқ босқичда эмланмаган.

Бу турли эпидемиялар, масалан, 2021–2022 йилларда қизамиқ билан касалланиш кўрсаткичлари икки баравар кўпайишига сабаб бўлган.

Қолаверса, экспертлар беморлар сони ортиши Африка ва Жанубий Осиёда ваксиналар тақчиллиги муаммоси билан ҳам боғлиқ, деган хулосада.

• Болалар
• UNICEF
• Вакцина