Бош прокуратура ҳузуридаги Департаментнинг ҳудудий бўлимлари томонидан терговга қадар текширувлар ўтказилди.

Унга кўра, Каттақўрғонда «Н.А.» МЧЖ раҳбари Н.М. ва бошқалар «Микрокредитбанк» АТБ Каттақўрғон филиалидан корхонага паррандачиликни ривожлантириш учун ажратилган 900 млн. сўм имтиёзли кредит маблағини сохта ҳужжатларни расмийлаштириш орқали бошқа мақсадларда сарфлаб талон-тарож қилганликлари аниқланган.

Шунингдек, Хивада фуқаро М.Р. 245 млн. сўм кредит эвазига харид қилинган «Малибу-2» русумли автотранспорт воситасини гаровга қўймасдан бошқа шахсга сотиб юбориб, ушбу маблағларни шахсий эҳтиёжлари учун ишлатиб юборганлиги ойдинлашган.

Бундан ташқари, Чироқчида «В.г.» МЧЖ раҳбари Б. Р. (муқаддам фирибгарлик ва бошқа жиноятлари учун судланган) ва бошқалар таъминотчи корхона сифатида 5 нафар фуқарога чорва молларини етказиб бермасдан, банк филиалидан ажратилган 150 млн. сўм имтиёзли кредит маблағини нақдлаштириб олиб, талон-тарож қилганликлари аниқланган.

Маълум қилинишича, мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-тарож қилиш), 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.

• Departament
• Кредит
• Талон-тарож
• pul