АҚШ президенти Доналд Трампнинг махсус вакили – Москва ва Вашингтон ўртасида Украина бўйича музокаралар олиб бораётган дипломат Стив Уиткофф Украинада президентлик сайловлари ўтказилиши тўғрисида маълум қилди.

“Улар (сайловлар) бўлади. Украина раҳбарияти бунга рози бўлди. Украинада сайловлар бўлиб ўтади”, – деган Уиткофф.

Шунингдек, у Украина президенти Владимир Зеленский ва унинг идораси раҳбари Андрей Ермак Украина НАТОга аъзо бўла олмаслигини деярли тан олганлигини айтиб ўтган. Украинанинг НАТОга қўшилишдан воз кечиши Россиянинг асосий талабларидан бири саналади.

Уиткоффнинг айтишича, шунга қарамай, Украинага НАТОнинг 5-моддасига ўхшаш хавфсизлик кафолатларини тақдим этиш масаласи муҳокамада қолмоқда. Мазкур модда бўйича иттифоққа аъзо давлатга қилинган ҳужум НАТОнинг барча аъзоларига қилинган ҳужум сифатида баҳоланади.

Бундан ташқари, Уиткофф музокаралар доирасида Қора денгизда ўт очишни тўхтатиш бўйича келишув ҳам муҳокама қилинаётганини маълум қилган.

Унинг сўзларига кўра, муҳим мақсад – 30 кунлик ўт очишни тўхтатиш ва бу вақт ичида доимий сулҳ юзасидан музокаралар олиб бориш. Бундан ташқари, у АҚШ маъмурияти Украина учун адолатли келишувга эришиш тарафдори эканини, бироқ учинчи жаҳон уруши бошланишига йўл қўймаслигини қўшимча қилган.

Уиткофф, шунингдек, Россиянинг Европага ҳужум қилиш режаси йўқлигига тўлиқ ишонишини айтган. Унинг сўзларига кўра, АҚШ ва Россия раҳбарлари ўртасидаги учрашув яқин бир неча ой ичида бўлиб ўтади.

• АҚШ
• Президент
• Украина
• saylov