Мамлакатнинг ижобий имижи ҳар бир давр ва замонда керак бўлади. 21-асрга келиб самарали халқаро муносабатларни ўрнатиш учун мамлакатнинг ижобий қиёфасини шакллантириш ҳар қандай замонавий давлатнинг стратегик вазифасига айланди. Шиддат билан ривожланаётган замонавий дунёда мамлакат бошқа давлатлар билан иқтисодий, ижтимоий, маданий, илмий-техникавий таълим ва ахборот соҳаларида ҳамкорлик қилмай туриб ривожлана олмайди. Давлатнинг имижи эса бевосита ушбу омилларнинг амалга ошишида сезиларли рўл ўйнайди. Мана шундай ижобий имижлар қайсидир маънода давлатга ўзга юрт вакилларида инвестициялар киришида жуда муҳим ҳисобланади.

Давлатнинг имижини яратишда асосан унинг табиий омиллари, тарихи, маданияти, географик жойлашуви, иқтисодий ва инсон ресурсларининг мавжудлигига эътибор қаратиш лозим. Мамлакатнинг ижобий имижи унинг рақобатбардошлиги, муваффақиятлилиги, барқарорлиги, ички ва ташқи бозордаги даражасини белгилайди. Шундай жиҳатларга асосланиб давлат ўзгаларнинг эътибор ва ишончига эришади. Бу эса нафақат ички ва ташқи иқтисодиётда балки мамлакатлар алоқаларида ҳам муҳим ҳисобланади. Ўзбекистоннинг собиқ Ташқи Ишлар вазири Абдулазиз Комилов шундай дейди: “Тасвир - давлатнинг ички ташқи сиёсатидир. Тасвир яратиш жуда қийин, ҳар куни давлатнинг кучли имижини яратиш учун кучли ҳаракат қилиш керак”. Бу эса худди қурилишда уйни жозибали ва мустаҳкам қуришга ўхшайди, яъни давлат имижини яратиш жуда катта сиёсатни амалга ошириш демакдир.

Ўзбекистоннинг ижобий имижи асосан нималарда кўринади?

1. Меҳмондўст давлат сифатида ижобий имиж яратилган;

2. Туризм соҳасида ҳам тарихий обидаларимиз тўлақонли бўлмаса-да, давлатнинг ижобий имижи ҳисобланади. Бу жиҳатни ривожлантиришга алоҳида эътибор қаратиш лозим.

3. Доимий равишда ўз фуқароларини ҳимоя қилади. (Суриядаги аёлларнинг ва чет элда қаровсиз қолган ўзбекистонлик болаларнинг юртига қайтарилиши);

4. Ўзбекистон қўшни мамлакатлар билан доимий яхши алоқада эканлиги. Зарур ҳолларда маданий ва гуманитар ёрдамлар қабул қилади ва жўнатади.

Ўзбекистоннинг салбий имижи нималарда акс этган?

1. Туризм мақсадида келганлар ўз ижтимоий саҳифаларида транспортни хусусан, поездларни танқид остига олиб ёзгани. Бу салбий имиж яратилишига сабаб бўлади. Чунки ушбу саёҳатчиларнинг блогларида минглаб балки, миллионлаб обуначилари бор.

2. Тошкентнинг экологик вазияти: ҳавонинг ифлосланиши (доимий равишда ҳавоси ифлос шаҳарлар рейтингида юқори ўринларда туради).

3. Бутунжаҳон иқтисодий форум Рақобатбардошлик индекси энг яхши ва ёмон йўлларга эга мамлакатлар рейтингига Ўзбекистонни киритмаган.

Бундай кўрсаткичларда мамлакатнинг юқори рейтингларда акс этмагани эса ўзга давлатлар тасаввурида салбий фикрларни келтириб чиқаради. Шундан келиб чиқиб давлат ҳақида умумий тушунчалар шаклланади. Бу тушунчаларга таяниб инвестиция киритилмаслиги ёки кечиктирилиши мумкин. Албатта, давлатлар сармоя киритишдан аввал давлатнинг автойўлларига ва бошқа жиҳатларига эътибор қаратиши табиий.

Қувонарлиси эса хорижда мақсадли тарғибот тадбирларини ташкил этиш масаласи эътибордан четда қолмаган. Айниқса, сўнгги йилларда “Ўзбекистон маданият кунлари”, давра суҳбатлари, кўргазмалар ва фестиваллар ўтказиш билан боғлиқ ташкилий ишларга алоҳида эътибор қаратилган. Шунингдек, ватандошлар иштирокида Ўзбекистон Республикасининг халқаро майдондаги имижини оширишга қаратилган тадбирлар ташкил этиш режалаштирилган. Буларнинг барчаси юрт келажаги ва янги марралар учун хизмат қилиши табиий. Ахир айтишади-ку, “Онангни отангга бепардоз кўрсатма”, деб. Шундай экан, биз ҳам бор имкониятларимизни кўрсатиб беришимиз зарур, албатта. 
                                                                                                                                       Мақола муаллифи: Олимжанова Гулзода

• Инвестиция
• Таълим
• savdo