Кадастр агентлигининг Фарғона вилояти Риштон тумани бўлими бош инспектори  коррупсион хатти-ҳаракатига чек қўйилди. 

Дастлабки суриштирув жараёнида кадастр агентлиги бош инспектори фуқаронинг яшаш ҳудудида қўшимча ер майдони қўшиб олингани ва у ўзбошимчалик эгаллаб олинган ерда қурилиш қилгани учун 84 млн сўм жарима солинишини билдиради. Шундан сўнг, бош инспектор фуқарога бу вазиятдан осон қутулиш йўлини кўрсатиб, унга жарима қўлламаслик ҳамда ерни қонунийлаштириб бериш эвазига 400 АҚШ доллари талаб қилади.

ДХХнинг Фарғона вилояти бўйича бошқармаси ҳамда бошқа ҳуқуқ-тартибот идоралари ҳамкорлигида фуқаро аризаси асосида ўтказилган тезкор тадбирда бош инспектор талаб қилинган маблағни ўз хизмат жойи биноси олдида олган вақтида ашёвий далиллар билан ушланган.

Қурилиш фаолияти билан шуғулланувчи хусусий корхона 2025 йилнинг октябрь ойида “Фарғона сув қурилиш инвест” давлат муассасасининг маъмурий биносида 850 млн сўмлик мукаммал таъмирлаш ишларини амалга ошириш учун ўтказилган шаффоф тендер танловида  ғолиб чиқади.  Бироқ, ушбу давлат муассасаси бош муҳандиси ва бошқалар ўзаро тил бириктириб, хусусий корхонага мукаммал таъмирлаш ишларини бошлаш учун рухсат бериш эвазига хусусий корхона раҳбаридан 5500 АҚШ доллари талаб қилишади.

Мазкур ҳолат бўйича ўтказилган тезкор тадбирда юқоридаги шахслар 5 минг АҚШ долларини олган вақтларида уларнинг ноқонуний хатти-ҳаракатлари фош этилади.

Айни пайтда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

• ДХХ
• Фарғона
• Жиноят
• Коррупция