Тошкент метрополитенида 16 та бекатда кассалар ёпилиб, инфокиоскалар ишга туширилади.

Тошкент метрополитени раҳбарияти тўлов тизимида шаффофликни таъминлаш, хизмат сифатини ошириш ҳамда электрон тўловларни рағбатлантириш мақсадида бир қатор бекатларда кассалар фаолиятини тўхтатмоқда. Хусусан, 2025 йил 9 декабрдан бошлаб:

“Ерусти ҳалқа йўли” йўналишидаги барча 14 та бекатда, “Пахтакор” ва “Алишер Навоий” бекатларида кассалар ёпилади.

Бу бекатларда замонавий QR-кодли чипталар берувчи инфокиоскалар ишга туширилди. Инфокиоскалар афзалликлари:

Нақд пул айланмаси камайиб, тўловлар янада шаффоф ва хавфсиз бўлади;

Чипта хариди тезлашади, навбатлар қисқаради;

QR-кодли чиптадан мобил телефон орқали ёки чоп этилган квитанция кўринишида фойдаланиш мумкин.

Бугунги кунда пойтахт метрополитени йўловчиларига қулайлик яратиш ҳамда касса олдидаги тирбандликларни камайтириш мақсадида йўл ҳақини тўлашнинг 10 дан ортиқ тури мавжуд бўлиб, метрода тўлов тизимини амалга оширишда электрон турдаги тўлов усуллари янада ривожланиб бормоқда. Шунингдек, метро хизматидан камдан-кам фойдаланувчилар учун янада қулайлик ҳосил қилиш мақсадида кўплаб бекатларда чипта сотиб олиш учун мўлжалланган автоматлаштирилган банкоматлар ўрнатилмоқда.

Шу сабабли касса оператори лавозимидаги ходимларга бўлган талаб камайиб бормоқда. Шу муносабат билан ёпилган кассалардаги оператор лавозими иш ўринлари босқичма-босқич қисқартирилмоқда. Жумладан, биринчи босқич доирасида 204 та касса оператори лавозим штатлари белгиланган норматив ҳуқуқий ҳужжатлар асосида қисқартирилди.

Автоматлаштирилган банкоматларни метрополитеннинг барча бекатларида йил якунига қадар ўрнатиш режалаштирилган ва бунинг натижасида Тошкент метрополитенида касса оператори ва катта оператор лавозимларига бўлган эҳтиёж қолмайди ҳамда ушбу лавозимлар тўлиқ тугатилади.

• Метро
• Тошкент