Кеча, 5 март куни эълон қилинган бюджет лойиҳасига кўра, Хитой 2023 йилда ҳарбий бюджетини 7,2 фоизга ошириб, 1 трлн. 553,7 миллиард юанга (бугунги курс бўйича қарийб 224,8 миллиард доллар) етказади.

“Миллий мудофаа харажатлари 1 трлн 553,7 миллиард юанни ташкил этади, бу 7,2 фоизга ўсиш”, – дейилади Бутунхитой халқ вакиллари йиғилишининг йиллик сессияси очилишида эълон қилинган ҳужжатда.

XIV Бутунхитой халқ вакиллари конгрессининг биринчи сессияси матбуот котиби Ван Чао 4 март куни бўлиб ўтган матбуот анжуманида Хитой ўзининг мудофаа бюджетини мураккаб хавфсизлик муаммоларини ҳал қилиш ва йирик давлат мажбуриятларини бажариш заруратидан келиб чиқиб ошираётганини таъкидлади. Унинг сўзларига кўра, Хитой қуролли кучларини модернизация қилиш дунёнинг ҳеч бир давлатига хавф туғдирмайди.

Қайд этилишича, Хитой урушларда қатнашмайди ва ҳарбий доктринанинг мудофаа характерига амал қилади, лекин шу билан бирга у ҳар йили мудофаа харажатларини оширади. Ҳозирги вақтда ХХР ҳарбий бюджети дунёда АҚШдан кейин иккинчи ўринда туради. 2022 йилги бюджет лойиҳасига кўра, Хитой ҳарбий бюджетни йиллик ҳисобда 7,1 фоизга ошириб, ҳарбий бюджетни 1,45 триллион юанга (209,9 миллиард доллар) етказишни режалаштирган.

Бу тенденция бошқа давлатлар томонидан ташвиш ва танқидларга сабаб бўлган, бироқ Хитой расмийлари мамлакатнинг ҳарбий харажатлари оқилона эканлиги ва улар мамлакат иқтисодий ривожланишига мос равишда барқарор ўсишни сақлаб қолишларини таъкидламоқда.

• Ҳарбий
• Хитой