Маълумотларга кўра, жорий йилнинг 25-30 апрель кунлари Хоразм вилоятининг Хива шаҳрида “Лазги” II халқаро рақс фестивали бўлиб ўтади. Бу ҳақда Маданият вазирлиги матбуот хизмати хабар берди.

Қайд этилишича, ЮНЕСКО шафелигида ўтказилаётган “Лазги” II халқаро рақс фестивалида бугунга қадар 18 та давлатдан (Франция, Тожикистон, Туркманистон, Қозоғистон, Беларус, Россия, Туркия, Қирғизистон, Сербия, Бразилия, Покистон, Италия, Корея, Индонезия, Миср, Ҳиндистон, Озарбайжон, Эрон) 20 та рақс гуруҳларининг фестивалга иштирок этиш истаги билдирилган. Миср, Қозоғистон, Туркманистон, Қирғизистон, Тожикистон маданият вазири ҳамда АЙСЕСО бош директори фестивалда Фахрий меҳмон сифатида иштирок этиши кутилмоқда.

Айни вақтга қадар 5 та (Германия, Корея, Ўзбекистон, АҚШ, Қозоғистон) давлатдан ҳакамликка номзодлик учун ариза келиб тушгани, “Лазги” халқаро рақс фестивали доирасида ташкил этиладиган халқаро илмий-амалий конференцияда иштирок этиш учун 50 га яқин маҳаллий олимларнинг, 25 дан ортиқ хорижий олим ва соҳа вакиллари, хусусан: Ҳиндистон; ХХР (офлайн); АҚШ (офлайн); Россия (офлайн); Туркия (офлайн); Миср (офлайн); Қозоғистон ва бошқа давлат вакилларидан фестивалда иштирок этиш тўғрисида мурожаат келиб тушган.

Шунингдек, фестивалнинг очилиш маросими 25 апрель куни тантанали равишда ташкил этилиши ва таниқли санъаткорлар иштироки режалаштирилган.

Эслатиб ўтамиз, 2022 йили Хоразм вилоятининг Хива шаҳрида бўлиб ўтган “Лазги” халқаро рақс фестивалида дунёнинг 30 давлатидан 175 дан зиёд раққосалар, рақс жамоалар, рақс санъати усталари, мусиқашунос ва санъатшунос олимлар, таниқли санъаткорлар, мутахассислар, фахрий меҳмонлар ва оммавий ахборот воситалари ходимлари иштирок этган.

• фестиваль
• Лазги
• Тошкент
• Хива
• Хоразм