Ижтимоий тармоқларда Хоразмда мактаб ўқувчилари шоли ўримига жалб қилингани ҳақида хабарлар тарқалди. Воқеа юзасидан Олий Мажлис Сенати расмий муносабат билдирди.

Маълум қилинишича, ушбу ҳолат Одам савдосига ва мажбурий меҳнатга қарши курашиш Миллий комиссияси томонидан назоратга олинди.

Миллий комиссия аъзолари томонидан мактаб ўқувчиларнинг шоли ўрими ишларига жалб қилиниши ҳолати зудлик билан ўрганилмоқда ҳамда масъулларнинг фаолиятига ҳуқуқий баҳо берилиши масаласи назоратга олинган.

Қайд этилишича, мазкур ҳолат бўйича ўрганиш натижалари ҳақида қўшимча ахборот берилади.

Шу ўринда, Сенат Конституцияга мувофиқ мамлакатда мажбурий меҳнат тақиқланганлигини ҳамда миллий қонунчиликда болалар меҳнати ва мажбурий меҳнат учун маъмурий ва жиноий жавобгарлик белгиланганлиги ҳақида эслатиб ўтган.

"Агар Сиз ёки вояга етмаган фарзандингиз мажбурий тарзда бирор бир меҳнатга жалб этиш, муносиб меҳнат ва дам олиш шароитларини яратиш, иш ҳақини ўз вақтида бермаслик билан боғлиқ муаммоларга дуч келсангиз “1176” ҳамда “1092” рақамли “ишонч телефон”ларига мурожаат қилишингизни сўраймиз.

Ҳар бир маълумот ва мурожаат белгиланган тартибда тезкорлик билан ўрганиб чиқилади ва тегишли зарур чоралар кўрилади. Мурожаатчининг розилигисиз шахсига доир бирон-бир маълумот ошкор этилмаслиги кафолатланади", дейилади хабарда.

• Мажбурий_ме=нат
• Сенат
• Хоразм