14 апрель куни Президент Мирзиёевга Янги Тошкентдаги Чирчиқ дарёси бўйидаги 20 гектар майдонда океанариум қуриш лойиҳаси тақдим этилди. Қурилиш вазири ўринбосарининг сўзларига кўра, у Марказий Осиёдаги энг йирик шундай объект бўлади.

Янги Тошкент шаҳри қурилиш дирекцияси директори, қурилиш ва уй-жой коммунал хўжалиги вазири ўринбосари Давронжон Одилов “Ўзбекистон 24” телеканалига берган интервьюсида океанариум Марказий Осиёдаги энг йириги бўлишини айтган.

“Лойиҳада савдо ва кўнгилочар марказлар, хизмат кўрсатиш объектлари, битта йирик 4 юлдузли меҳмонхона мавжуд. У Чирчиқ дарёси бўйида 20 гектар майдонда жойлашади. Шунингдек, ушбу лойиҳа Янги Тошкентга инвестиция киритиш ҳажмини ошириш, янги имкониятлар ва иш ўринлари яратиш имконини беради”, — дейди у.

Лойиҳа амалга оширилиши натижасида 1600 та янги иш ўрни яратилиши кутилмоқда.

Аввалроқ Тошкент вилояти ҳокимлиги Паркент туманида 20 гектар майдонда аквапарк, аттракционлар, бассейн ва бошқа иншоотлар қуриш режалаштирилаётгани ҳақида хабар берганди. Лойиҳанинг қиймати 30 миллион долларга баҳоланмоқда.

• Лойиҳа
• Шавкат Мирзиёев
• Тошкент