Бугун 2 октябр куни Тошкент шаҳар Яшнобод туманининг айрим ҳудудларида электр энергияси таъминотида узилишлар кузатилди. Бу ҳақда Тошкент шаҳар электр тармоқлари корхонаси АЖ Матбуот хизмати хабар берди.

Қайд этилишича, соат 09:40 да Яшнобод туманининг Авиасозлар мавзеси 3 ва 4-даҳаларида, 58-сонли Харбийлар шаҳарчаси, Янгиобод мавзеси, Асалобод ҳамда Дубовая кўчаларидаги аҳоли яшаш хонадонларида электр энергияси таъминотида узилиш содир бўлган.

Туман ҳудудида жойлашган қуввати 110/35/10 киловатт бўлган юқори кучланишли “Ҳосилот” нимстанциясининг қуввати 10 киловатт бўлган қисмида авария ҳолатида электр энергиясидан узилиш содир болди.

“Мазкур носозлик “Тошкент шаҳар электр тармоқлари корхонаси” АЖ раҳбарияти томонидан зудлик билан назоратга олиниб, юзага келган аварияни бартараф этиш ишларига киришилди.

Жумладан, жамиятнинг тегишли бўлим, хизматлари, тезкор аварияни бартараф этиш бригадалари томонидан юқори кучланишли электр узатиш тармоғини кўрикдан ўтказиш ва носозликни бартараф этиш ишлари олиб борилмоқда”, – дейилади хабарда.

Ҳудуддаги барча бригадалар зарур ҳимоя воситалари, зарур электр қурилмалари ҳамда махсус автотранспорт воситалари билан жиҳозланган.

Таъкидланишича, тез орада юзага келган носозлик тўлиқ бартараф этилиб, тармоқ орқали электр энергияси етказиб берилиши бошланади.

• Электр энергияси
• Тошкент