Тошкент вилояти ва Қорақалпоғистон Республикасида ер майдонлари савдоси билан боғлиқ фирибгарлик ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш Департаментнинг матбуот хизмати хабар берди.

Қайд этилишича, Бош прокуратура ҳузуридаги Департаментнинг Ўртачирчиқ туман бўлими томонидан ИИБ ходимлари билан ҳамкорликда тезкор тадбир ўтказилган. Ушбу жараён давомида, фуқаро И.Қ. Нурафшон шаҳар, “Дегантепа” МФЙдаги 20 сотих бўш ер майдонини фуқаро A.С.гa фирибгарлик йўли билан 14 500 АҚШ долларига сотишга келишиб, танишлари ёрдамида ер майдони ҳужжатларини расмийлаштириб беришни ваъда қилиб, олдиндан 5 500 АҚШ долларини олган вақтида ашёвий далиллар билан ушланган.

Шу каби, Департаментнинг Шуманай туман бўлими томонидан ўтказилган тезкор тадбирда, фуқаро Д.К. сохта ҳужжатлар орқали ўзининг номига расмийлаштириб олган Нукус шаҳар, “Қум овул” МФЙдаги захирадаги 6 сотих ер майдонини фуқаро M.A.гa сотишга келишиб, ушбу ер майдони учун 37 млн сўмни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик), 28, 211-моддаси (пора бериш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.

• Departament
• Фирибгарлик
• Ер-кадастр