Европа Иттифоқи дипломатияси раҳбари Жозеп Боррел Россия Навалнийнинг тўсатдан ўлими ҳолатлари бўйича мустақил ва шаффоф халқаро терговга рухсат бериши кераклигини айтмоқда.

Европа кенгаши эълон қилинган баёнотда Боррел мухолифатчининг ўлими учун жавобгарлик Россия президенти Владимир Путин ва Россия ҳукумати зиммасига юкланганини айтган.

“Европа Иттифоқи ҳамкорларимиз билан биргаликда Россиянинг сиёсий раҳбарияти ва ҳокимиятини жавобгарликка тортиш ва уларнинг ҳаракатлари учун қўшимча санкциялар жорий этиш учун барча саъй-ҳаракатларни амалга оширади” — деган Боррел.

У Навалний хотирасига бағишланган митингларда Россияда ҳибсга олинган барча одамларни зудлик билан озод қилишга чақирди.

Европа дипломатияси раҳбари Навалний бутун умри давомида ақл бовар қилмайдиган жасорат кўрсатганини ва уруш ҳамда Россияда бўлажак президентлик сайловлари фонида “Путин ва унинг режими Навалнийдан қўрқишганини” таъкидлаган.

“Европа Иттифоқи Россияни бошқа барча сиёсий маҳбусларни, жумладан Юрий Дмитриев, Владимир Кара-Мурза, Иля Яшин, Алексей Горинов, Лилия Чанишева, Ксения Фадеева, Александра Скочиленко ва Иван Сафроновни зудлик билан ва сўзсиз озод қилишга чақиради” – дейилади хабарда.

• Алексей Навалний
• Путин
• Россия
• Yevropa Ittifoqi