“Apple” компанияси “Interbrand” талқини бўйича дунёдаги энг қиммат брендлар рейтингида ўз етакчилигини сақлаб қолишга муваффақ бўлди. “Iphone” ишлаб чиқарувчиси кетма-кет ўнинчи бор биринчи ўринни эгаллади. Компания брендининг қиймати 482,2 миллиард долларга баҳоланмоқда, бу ўтган йилги натижадан 18 фоизга юқори.

Ўтган йилгидек кучли учликдан “Amazon” ва “Microsoft” ўрин олган, бироқ бренди йил давомида қиймати 32 фоизга ошган “Microsoft” 278,3 миллиард долларга баҳоланди ва бу Жефф Безос компаниясини қарийб 3,5 миллиард доллар фарқ билан ортда қолдириш ва рейтингда иккинчи ўринни эгаллаш имконини берди. “Amazon” бренди 2022 йилда 274,8 миллиард долларга баҳоланди.

Рейтингга киритилган брендларнинг умумий қиймати йил давомида 16 фоизга ўсиб, рекорд даража – 3,1 триллион долларга етган.

Энг қиммат брендлар ўнлигида “Google” (251,75 миллиард доллар), “Samsung” (87,7 миллиард доллар), “Toyota” (59,76 milliard dollar), “Coca-Cola” (57,5 миллиард доллар), “Mercedes-Benz” (56,1 миллиард доллар), “Disney” (50,3 миллиард доллар) ва “Nike” (50,29 миллиард доллар) номлари қайд этилган.

“Interbrand” томонидан эълон қилинаётган рейтингдан жой олишнинг бир қанча шартлари бор. Масалан компания даромадининг камида 30 фоизи бренд ишлаб чиқарилган мамлакатдан ташқаридаги ҳудудлардан олиниши керак. Иккинчи мезон – Осиё, Европа ва Шимолий Америкада муҳим бренд мавжудлиги, шунингдек, ривожланаётган бозорларда кенг вакиллик.

Шунингдек, узоқ муддатда кутилаётган фойда бўлиши ҳамда бренд капитали қийматидан ортиқ даромад келтириши ва халқаро иқтисодиётда тан олиниши керак.

• Amazon
• Apple
• Бренд
• Microsoft
• Samsung
• миллиардерлар