Samarqandda yangilanayotgan aeroport hududiga qo‘shilishi kerak bo‘lgan yangi hududdan qadimiy qabrtoshlari topildi. 

Samarqand viloyati madaniy meros boshqarmasi mutaxassislari olib borgan o‘rganishlarga ko‘ra, mazkur qabrtoshlar haqiqatda qadimiy bo‘lib, ular qurilish ishlari olib borilayotgan hududdagi dala hovlilar o‘rnida aniqlangan.

Qabrtoshlar Samarqand arxeologiya instituti va SamDU Tarix fakulteti xodimlari tomonidan o‘rganildi. O‘rganish jarayonida o‘lchami 154x50x34 santimetrli sandiq shaklidagi qabrtosh oq marmardan ishlangani va toshning usti va yon tomonlarida “Baqara” surasining 254, 256-oyatlari tushirilgani ma’lum bo‘ldi. Qabrtoshning ayrim qismlari yaxshi saqlamaganligi shaxsning dafn etilgan vaqti va to‘liq ism-sharifi haqida ma’lumot olish imkonini bermagan. Ammo shikast yetmagan qismidagi “Oqila bibi” degan yozuv o‘qib olingan. 

Ikkinchi qabrtosh ham sandiq shaklida bo‘lib, qora marmar toshdan ishlangan, unda hijriy 1049-yil (milodiy 1659-yil) sanasi bitilgan, o‘lchami 116x37x25 sm. Qabrtosh sohibining ismi yozilgan tomoniga shikast yetganligi sababli hozircha bu borada ma’lumot mavjud emas. 
Madaniy meros agentligining Xabardor.uz’ga ma’lum qilishicha, ayni vaqtda tadqiqot ishlari davom etmoqda. 

Qabrtoshlar Samarqand xalqaro aeroporti MChJ tomonidan Samarqand o‘lkashunoslik muzeyiga olib kelindi, tadqiqot ishlari davom etmoqda.