18-dekabr kuni AOKA hamda Jizzax viloyat hokimligi tomonidan viloyat boʻylab Respublika va mahalliy OAV vakillari uchun press-tur tashkil etildi.

Dastlab press-tur ishtirokchilari yaqinda tashkil etilgan xalq deputatlari viloyat Kengashi binosiga tashrif buyurib, Kengashda deputatlar uchun yaratilgan qulayliklar bilan tanishdilar. 

Jizzax viloyati Xalq deputatlari viloyat kengashi kotibiyati mudirasi Nodira Karimovaning taʼkidlashicha, kotibiyat uchun yangi binodan 3 ta xona ajratilib, zamonaviy kompyuter va jihozlar bilan taʼminlangan, zarur shar-sharoitlar yaratilgan. 

2021-yilning yanvar-noyabroylari davomida xalq deputatlari viloyat Kengashining 13 ta sessiyasi oʻtkazilib, unda 220 ta masalalar muhokama qilingan.

Qayd etilishicha, joriy yilda hududni ijtimoiy-iqtisodiy rivojlantirishga qaratilgan dasturlarning ijrosi, hokimlar, uning oʻrinbosarlari, tegishli boshqarma tashkilotlarning hisobot va axborotlarini eshitish rejalashtirilgan. 

Shundan soʻng, ishtirokchilarning media-tur doirasidagi ilk manzili Jizzax shahridagi aholi bandligini taʼminlash, ularni kasbga yoʻnaltirish maqsadida bunyod etilgan “Monomarkaz” boʻldi.

Quvvati bir vaqtning oʻzida 490 oʻrinli boʻlgan Jizzax shahridagi “Ishga marhamat” monomarkazi binosini taʼmirlash va jihozlashda, Bandlikka koʻmaklashish davlat jamgʻarmasi hisobidan 14 milliard 400 million soʻm va Jahon bankining 1 milliard 145 million soʻmdan ortiq mablagʻlari jalb etilgan.

Mazkur monomarkazda 5 ta xizmat turi, 22 turdagi kasbga oʻqitish va 5 ta til oʻrgatish kurslari faoliyat yuritmoqda. 
Monomarkazda “Yoshlar daftari”ga kiritilgan bandligi vaqtincha taʼminlanmagan jizzaxlik yigit-qizlar uchun servis va xizmat koʻrsatish sohasi boʻyicha 8 ta, texnik soha boʻyicha 7 ta, qurilish sohasi boʻyicha 5 ta, qishloq xoʻjaligi sohasida 2 ta kasb turlari tashkil etilgan.

Shuningdek, xorijiy tillarni oʻrgatish kursida rus, ingliz, koreys, xitoy va yapon tillari, raqamli texnologiyalarni oʻrgatish kursida esa kompyuter savodxonligi, dasturchi 1S buxgalteriya mutaxassisliklari oʻrgatiladi.

Qayd etilishicha, ayni paytda monomarkazda 24 ta kasb-hunar va 3 turdagi til oʻquv kurslarida 317 nafar band boʻlmagan yoshlar oʻqitilib, kasb-hunarga oʻrgatilmoqda.

• Jizzax
• Media-tur