Jinoyat ishlari bo‘yicha Quva tumani sudida 28-noyabr kuni Furqat tumani IIB sobiq boshlig‘i Akmal Xo‘jayev va uning birinchi o‘rinbosari Jasur Rasulov ishi bo‘yicha sud hukmi o‘qildi. Bu haqda Farg‘ona viloyati sudlari matbuot xizmati xabar bermoqda.

Akmal Xo‘jayev (1986-yilda tug‘ilgan) va Jasur Rasulov (1991-yilda tug‘ilgan) Jinoyat kodeksining quyidagi moddalarida nazarda tutilgan jinoyatlarni sodir etganlikda aybli deb topildi:

– 141−3-moddasi 2-qismi “b” bandi (Bir guruh shaxslar tomonidan oldindan til biriktirib sodir etilgan shaxsning sha’nini va qadr-qimmatini kamsituvchi hamda inson hayotining sir tutiladigan tomonlarini aks ettiruvchi ma’lumotlarni oshkor qilish);

– 142-moddasi (Fuqarolarning turar joyi daxlsizligini buzish);

– 206-moddasi (Hokimiyat yoki mansab vakolati doirasidan chetga chiqish) 1-qismi;

– 230−2-moddasi (Tezkor-qidiruv faoliyati natijalarini soxtalashtirish (qalbakilashtirish)) 1-qismi;

– 234-moddasi (Qonunga xilof ravishda ushlab turish yoki hibsga olish) 1-qismi.

Ularning har biriga 3 yil muddatga IIV tizimida hamda davlat ishtirokidagi korxona, muassasa va tashkilotlarda mansabdorlik va moddiy javobgarlik yuklatilgan ishlarda ishlash huquqidan mahrum qilgan holda 4 yil muddatga ozodlikdan mahrum qilish jazosi tayinlandi.

Tayinlangan jazoni manzil-koloniyalarida o‘tattirilishi belgilandi.

Jabrlanuvchilar — Furqat tumanidagi maktab direktori Gulira’no Qosimova va soliq inspeksiyasi boshlig‘i Qurbonali Abdurahmonovga kelgusida ma’naviy zarar va boshqa zararlar yuzasidan tegishli hujjatlarni ilova qilgani holda fuqarolik ishlari bo‘yicha sudga murojaat qilish huquqlari tushuntirildi.

“Jinoyat ishlari bo‘yicha Quva tuman sudining ushbu hukmi ustidan taraflar qonunda belgilangan tartib va muddatda Farg‘ona viloyat sudining jinoyat ishlari bo‘yicha sudlov hay’atiga apellyatsiya/kassatsiya tartibida shikoyat berish va protest keltirishga haqli”, — deyiladi xabarda.

Shuningdek, sudning alohida xabarnomasi bilan sudlanuvchilarga oid jinoyat ishi yuzasidan boshqa shaxslarga nisbatan jinoyat ishini qo‘zg‘atish to‘g‘risidagi masalani hal qilish uchun tegishli materiallarni ilova qilgan holda Farg‘ona viloyati prokuraturasiga xabar qilinishi belgilandi.

• Farg‘ona
• Jinoyat
• Sud