Ukraina prezidenti Volodimir Zelenskiy so‘zlariga ko‘ra, Rossiya Eronga “Shahed” dronlarini yetkazib bermoqda va ular AQSh hamda Isroilga qarshi qo‘llanishi mumkin. Bu haqda u shanba kuni CNN telekanaliga bergan intervyusida ma’lum qilgan.

Zelenskiy telekanal muxbiri Farid Zakariyaga bergan intervyusida Eron AQSh bazalariga hujum qilish uchun Rossiyada ishlab chiqarilgan “Shahed”lardan foydalangani “100% fakt” ekanini ta’kidlagan.

“Shahed” dronlari mintaqadagi boshqa hujumlarda ham qo‘llangani aytiladi, biroq ularning ishlab chiqaruvchisi har doim ham aniq bo‘lavermaydi. “Shahed” dronlari dastlab Eron tomonidan ishlab chiqilgan bo‘lib, ular qimmat raketalarga nisbatan ancha arzon muqobil hisoblanadi. Bu dronlar keng miqyosda ilk bor Rossiyaning Ukrainaga bosqini vaqtida qo‘llanila boshlagan. Ukraina ma’lumotlariga ko‘ra, 2022-yil kuzidan buyon Rossiya kuchlari tomonidan minglab shunday dronlar uchirilgan.

Dastlab dronlarni Erondan olgan Rossiya keyinchalik “Shahed” turidagi apparatlarni o‘z hududida ham ishlab chiqara boshlagan. Hozirda bunday turdagi dronlardan boshqa davlatlar armiyalari ham foydalanmoqda. Jumladan, AQSh harbiylari ham ular Eron bilan bog‘liq amaldagi harbiy kampaniyalarda qo‘llanayotganini bildirgan.

• AQSh
• Eron
• Isroil
• Ukraina
• Zelenskiy
• dron