Joriy yil 19-may kungi Hukumat qaroriga ko‘ra, 2022/2023-o‘quv yilidan davlat maktablarida o‘quvchilar uchun maktab formasi to‘liq joriy etiladi (ilgari 2024/2025-o‘quv yilidan boshlab joriy etilishi kerak edi).

Qayd etilishicha, 2022-yil 1-iyungacha hududlar kesimida 2022/2023-o‘quv yilida maktab formalariga ehtiyoj aniqlanadi.

Kam taʼminlangan oilalar farzandlari uchun maktab formasi mahalliy byudjet hamda “Temir daftar”, “Ayollar daftari” va “Yoshlar daftari” jamg‘armalari mablag‘lari hisobidan sotib olinishida ko‘maklashiladi.

Shuningdek, 2022-yil 10-avgustdan har bir tuman (shahar)da maktab formasi ishlab chiquvchilarning  savdo shoxobchalari tashkil etiladi.

Eslatib o‘tamiz, yagona maktab formasini joriy etish to‘g‘risidagi taklif dastlab 2017-yilda prezident Shavkat Mirziyoyev tomonidan ilgari surilgan va oradan bir yil o‘tib, hukumat qarori bilan maktab formalari namunalari tasdiqlanib, 2019/2020-o‘quv yilidan majburiy joriy etilishi belgilangan edi.

Biroq o‘sha yilning may oyida prezidentning qizi, o‘sha paytda Prezident Administratsiyasi huzuridagi Axborot va ommaviy kommunikatsiyalar agentligi direktori o‘rinbosari sifatida ishlagan Saida Mirziyoyeva majburiy yagona maktab formasini joriy etishdan avval maktablardagi kamchiliklarni bartaraf etish lozimligini taʼkidlagan va 2019-yilning 11-iyuniga kelib, sobiq xalq taʼlimi vaziri Sherzod Shermatov maktab o‘quvchilarining majburiy formasiga o‘tishi masalasining kechiktirilishi haqida maʼlum qilgan edi.

• Hukumat
• Maktab
• Mirziyoyeva
• Qaror
• Shermatov