“Dunyo” axborot agentligi xabariga ko‘ra, Saudiya Arabistoniga Umra ziyorati uchun borgan 170 dan ortiq fuqaro O‘zbekistonga qayta olmagan.

Ma’lum qilinishicha, Bosh konsulxona diplomatlari ayrim jismoniy shaxslar orqali umra ziyoratiga kelib, qiyin ahvolga tushib qolgan O‘zbekiston fuqarolarining muammolarini joyida o‘rganish hamda ular bilan suhbatlashish maqsadida Makka shahrida joylashgan “Kanari va Al-Ayam Elite” mehmonxonalariga tashrif buyurdi. Ayni paytda ushbu mehmonxonalarda jami 170 nafardan ortiq ziyoratchi O‘zbekistonga qaytishni kutib turibdi.

Ziyoratchilarning aytishicha, ular 14 kunlik umra safari doirasida turli guruhlar tarkibida Saudiya Arabistoniga kelgan. Biroq safarni tashkil etgan shaxslarning yolg‘on ma’lumotlari va xatolari oqibatida ular hozirga qadar vatanga qayta olmagan.

Suhbat davomida ziyoratchilar o‘zlarining og‘ir ahvoli haqida so‘zlab, guruhning katta qismi keksa yoshdagi insonlardan iborat ekanini ta’kidladi. Ular orasida infarktni boshidan o‘tkazgan, qandli diabet, qon bosimi kabi surunkali kasalliklarga chalingan va doimiy ravishda dori-darmon iste’mol qiladigan shaxslar borligi ham qayd etildi. Ziyoratchilar vatanga qaytish masalasida O‘zbekiston hukumatidan amaliy yordam so‘radi.

Vakolatxona vakillari so‘nggi yillarda umra ziyoratini tashkil etish uchun tegishli ruxsatnomaga ega bo‘lmagan ayrim “turistik firmalar” va “jismoniy shaxslar” tomonidan tartibsiz safarlar tashkil etilayotgani, bunday holatlar ko‘plab vatandoshlarning Madina va Jidda shaharlarida ham turli mushkul vaziyatlarga tushib qolishiga sabab bo‘layotganini bildirdi.

Muloqot chog‘ida O‘zbekiston Din ishlari bo‘yicha qo‘mitasi tomonidan berilgan litsenziya asosida 14 ta turistik firma umra ziyoratini rasmiy ravishda tashkil etayotgani, bu haqda ommaviy axborot vositalari va ijtimoiy tarmoqlarda muntazam axborot berib borilayotgani, shunga qaramasdan, ayrim fuqarolar noqonuniy tashkilotchilarning yolg‘on reklamalariga aldanib qolayotgani afsus bilan ta’kidlandi.

Ziyoratchilarga ular ruxsatnomasiz tashkil etilgan safar doirasida kelgan bo‘lsa-da, vatanga qaytish bo‘yicha murojaatlari Bosh konsulxona tomonidan belgilangan tartibda tegishli idoralarga yetkazilishi ma’lum qilindi. Shu bilan birga, mazkur murojaatlarni ko‘rib chiqish ma’lum vaqt talab qilishi inobatga olinib, vaziyat yanada og‘irlashib ketmasligi uchun imkoniyatdan kelib chiqqan holda o‘z hisoblaridan aviachipta xarid qilib, O‘zbekistonga qaytish tavsiya etildi.

Shuningdek, ziyoratchilarni qiyin ahvolga solgan shaxslarning noqonuniy xatti-harakatlari yuzasidan O‘zbekistonga qaytgandan so‘ng tegishli idoralarga murojaat qilish mumkinligi tushuntirildi. Hozirgi kunda ushbu holat Bosh konsulxona tomonidan doimiy nazoratga olingan bo‘lib, vaziyat yuzasidan tegishli chora-tadbirlar amalga oshirilmoqda.

• Makka
• O‘zbekistonlik
• Umra
• fuqaro