Ijtimoiy tarmoqlarda 18 yoshli talaba qiz o‘zini metro tagiga tashlagani haqida xabarlar tarqaldi.

Ma’lumotlarga ko‘ra, 12-oktyabr “Alisher Navoiy” metro bekatida xizmat qilayotgan IIO xodimi O.Ilhomov qiz elektr poyezdi stansiyaga yaqinlashayotgan paytda relsga sakrab tushganini payqab, unga yordamga shoshilgan va relsga sakrab tushib uni ko‘tarib tortib olishga harakat qilgan. Mashinist xodimni payqab, darhol elektr poyezdini to‘xtatgan. Bu vaqtda ikkinchi nazoratchi xodim A.Asqarov yordamga yetib kelgan va u ham relsga tushib, qizni birgalikda platformaga ko‘tarib olishgan.

Shundan so‘ng poyezdlar harakati tiklangan. Qiz bilan suhbat o‘tkazilganda, u 2005-yilda Farg‘ona viloyatida tug‘ilgani, hozirda Nizomiy nomidagi Toshkent davlat pedagogika universitetining 2-kurs talabasi ekani ma’lum bo‘lgan.

Qizga tibbiy yordam ko‘rsatilib, uning qarindoshlariga voqea haqida xabar berilgan.

Ushbu holat yuzasidan qiz hozirda ta’lim olayotgan Toshkent davlat pedagogika universiteti rasmiy ma’lumot berdi.

Mazkur holat ro‘y berganidan so‘ng universitet rahbariyati talaba qiz bilan uchrashgan va suhbat davomida qiz holsizligi tufayli boshi aylanib, o‘zi bilmagan holda “Alisher Navoiy” metro bekatida yiqilib tushgani ma’lum bo‘lgan.

“Poyezd relsiga sakradi” degan xabarlar asossiz. Hozirgi kunda talabaning ahvoli yaxshi, sog‘ligida hech qanday muammo yo‘q, o‘z uyida ota-onasi bag‘rida. Rahbariyat tomonidan barcha zarur bo‘lgan shart-sharoitlar yaratib berildi, - deyiladi xabarda.

• Farg‘ona
• Metro
• Pedagogika
• Poyezd