Oʻzbekiston Respublikasi Bosh prokuraturasi tomonidan BMT Taraqqiyot dasturi bilan hamkorlikda “Yangi Oʻzbekistonda oilaviy zoʻravonlikning oldini olish va oilaviy zoʻravonlikdan jabr koʻrganlarga amaliy koʻmak berish: muammo va yechimlar” mavzusida xalqaro konferensiya oʻtkazildi.

Unda qayd etilishicha, hozirga qadar xotin-qizlar muammolarini hal etish va ijtimoiy qoʻllab-quvvatlash maqsadida davlat byudjetidan 3 trillion soʻm, imtiyozli bank kreditlaridan 7 trillion soʻm pul ajratilgan.

Ayollarga nisbatan zoʻravonlik va tazyiq holatlari boʻyicha jabrlangan 29 ming 541 nafar xotin-qizning barchasiga “himoya orderi” rasmiylashtirilgan.

Zoʻravonlarning 62 ming 347 nafariga cheklovlar oʻrnatilib, profilaktika inspektorlari tomonidan nazoratga olingan.

Oʻz navbatida, himoya orderida belgilangan cheklovlarga rioya etmagan ming nafardan ortiq shaxs Maʼmuriy javobgarlik toʻgʻrisidagi kodeksning 206-1-moddasi, 674 nafari boshqa moddalar asosida maʼmuriy jazoga tortilgan.

Keltirilishicha, joriy yilning oʻtgan davrida sudlar tomonidan ayollarga nisbatan zoʻravonlik va tazyiq oʻtkazish bilan bogʻliq 2 ming 12 jinoyat ishi koʻrilgan boʻlib, ularda 1,6 ming nafardan ziyod shaxsga nisbatan ayblov hukmlari chiqarilgan.

Ushbu toifadagi jinoyatlarni sodir etganlarning 80 foizi hech qayerda ishlamaydigan shaxslar boʻlsa, ularning 19 foizini ayollar tashkil etadi.

Jabrlangan ayollarni uydan chiqarib haydash orqali tazyiq oʻtkazish holatlari boʻyicha 2 ming 71 daʼvo koʻrib chiqilgan boʻlib, shulardan 1,5 mingdan ziyodi yoki 76 foizi boʻyicha daʼvo qanoatlantirilib, tarafni uyga kiritish haqida sud qarorlari qabul qilingan.

Shuningdek, aliment undirishga doir 6 ming 585 ishning 5 ming 275 tasi yoki 80 foizi boʻyicha ariza talablari qanoatlantirilgan.

Bundan tashqari, 8 ming 457 nafar xotin-qiz murojaatlari bevosita prokuratura organlarida koʻrib chiqilib, 2,5 mingdan ortigʻi qanoatlantirilgan, 1 ming 877 nafarining buzilgan huquqlari tiklangan.

Mazkur oʻrganishlar natijasida qoʻpol qonun buzilish holatlari yuzasidan uchta jinoyat ishi qoʻzgʻatilgan, 114 protest, 101 taqdimnoma, 96 ogohlantiruv tarzidagi prokuror nazorati hujjatlari qoʻllanilib, 22,9 million soʻm zararlar undirilgan, 92 nafar mansabdor shaxs intizomiy yoki maʼmuriy javobgarlikka tortilgan.

• Bosh prokuratura
• Konferensiya
• statistika