Markaziy bank tomonidan 2021-yil yakunlari bo‘yicha to‘lov balansi joriy operasiyalari hisobining dastlabki ko‘rsatkichlari tayyorlandi.

Unga ko‘ra, tovarlar importi 23 mlrd. dollarni (2020-yilda 19 mlrd. dollar, 2019-yilda 21,2 mlrd. dollar) tashkil etib, o‘tgan yilga nisbatan 21 foiz yoki 4 mlrd. dollarga oshdi.

Eksport esa 14,1 mlrd. dollarni (2020-yilda 12,8 mlrd. dollar, 2019-yilda 13,9 mlrd. dollar) tashkil etib, tovarlar eksporti (oltinsiz) o‘tgan yilga nisbatan 42 foizga yoki 3,0 mlrd. dollarga oshib 10,0 mlrd. dollarni (2020-yilda 7,0 mlrd. dollar, 2019-yilda 9,0 mlrd. dollar) tashkil etdi.

Tovarlar importining asosiy qismi “mashinalar, uskunalar, mexanizmlar” – 6,2 mlrd. dollar (o‘tgan yilda 6 mlrd. dollar), “qimmatbaho bo‘lmagan metallar va ulardan buyumlar” – 3,2 mlrd. dollar (o‘tgan yilda 2,4 mlrd. dollar), “kimyo sanoati mahsulotlari” – 2,9 mlrd. dollar (o‘tgan yilda 2,4 mlrd. dollar) va “transport uskunalari” – 2,8 mlrd. dollar (o‘tgan yilda 2,2 mlrd. dollar) tovar guruhlariga to‘g‘ri keldi.

Xizmatlar importi o‘tgan yilga nisbatan 33 foiz yoki 1,2 mlrd. dollarga oshib, 4,7 mlrd. dollarni (2020-yilda 3,5 mlrd. dollar, 2019-yilda 5,4 mlrd. dollar) tashkil etdi. Bunda, xizmatlar importi tarkibida 2020-yilga nisbatan safarlar komponenti 664 mln. dollarga, transport xizmatlarida esa 453 mln. dollarga o‘sdi. 2019-yilda safarlar komponenti 33 foizga, transport xizmatlari esa 10 foizga yuqori bo‘lgan.

• Eksport
• Import
• Markaziy bank