31°
Kechasi 18°
2021 yilda Rossiyaga ishlashga borgan ayollar soni 10 foizga ortgan va ular endi jami mehnat muhojirlarining 40 foizini tashkil etmoqda. Bu haqda Rossiya Migrasiya tadqiqotlari markazi izlanishlari asosida BBC uzbek cayti xabar bergan.
Ta’kidlanishicha, Rossiyada mehnat muhojiri bo‘lgan ayollarning eng katta qismi o‘zbekistonliklar.
O‘zbek ayollarining Rossiyaga yo‘l olishi sabablari oiladagi iqtisodiy ahvolni yaxshilash, xususan, uy olish, imorat solish, yaqinlarini davolatish, bolalarini o‘qitish, qarz to‘lash kabi turli maqsadlar bilan izohlangan.
– Bizni Rossiyaga jo‘natib, bizga berilgan xonaga qaynimga kelin tushirildi. Er-xotin uy olish uchun harakatdamiz, – deydi Xabardor.uz bilan suhbatda bo‘lgan Moskvadagi kirxonalardan birida ishlayotgan samarqandlik ayol. Uning aytishicha, O‘zbekistonda subsidiyada uy olish uchun er-xotinning ish joyi, ish staji, boshlang‘ich to‘lov uchun pullari ham yo‘q ekan.
Tadqiqotlar ayol mehnat muhojirlarining o‘rtacha yoshi 30 yosh ekanini aniqlagan. Qirg‘izistondan ishga borgan xotin-qizlar asosan 30 yoshda bo‘lsa, O‘zbekiston va Tojikistonlik ayollar 30-40 yosh o‘rtasidagi ayollar. Ayrim hollarda 50, hatto 60 yoshdan oshganda mehnat muhojirligini bo‘yniga olgan ayollar ham uchraydi.
Ma’lumotlarga ko‘ra, o‘zbekistonlik ayollar Rossiyada asosan farroshlik, idish-tovoq yuvuvchilik, enagalik, uy xizmatchisi, oshpazlik, ko‘cha tozalovchi, sotuvchilik, ofisiantlik, ish yurituvchilik va qurilish sohalarida ishlashadi.
Statistik ma’lumotlar Rossiyadagi muhojir ayollarning 42 foizi xizmat ko‘rsatish va 33 foizi savdo tizimlarida ishlashini qayd etgan.
Ishga borgan ayollar haftada 6 kun va kuniga 12 soatdan mehnat qilishadi.
Tadqiqotlar dam olish kunisiz va tungi smenada ishlaydigan xotin-qizlar “Mehnat kodeksi”da belgilangan ish tartibi asosida ishlaydigan muhojir ayollardan uch barobar ko‘pligini aniqlagan.
Rossiyada ishlayotgan o‘zbekistonlik ishchi ayollarning o‘rtacha ish haqi 47 ming rubl (600 dollar) atrofida.
Statistikaga ko‘ra, muhojir ayollarning faqat 28 foizi oilali.
Rossiyaga ishlashga borayotgan Markaziy osiyolik ayollarning katta qismi – oila boqishni o‘z zimmasiga olgan xotin-qizlardir.
O‘rganishlar natijasida muhojir ayollarning 21 foizi farzandini Rossiyaga birga olib ketishi ma’lum bo‘lgan.
Hozirda Rossiya maktablarida o‘qiyotgan muhojir bolalarning soni 140 ming atrofida, voyaga yetmaganlar soni 800 mingdan ko‘pdir.
Rossiya Ta’lim vazirligi migrant bolalar orasida o‘qishga bormayotgan maktab yoshidagi bolalar ham ko‘pligini ta’kidlab keladi.
O‘zbekistonlik muhojir ayollar duch keladigan eng ko‘p muammolardan - firibgarlik, jinsiy zo‘ravonlik va qullik yoki odam savdosi qurboniga aylanish holatlari aksar rasmiy idoralargacha yetib bormaydi. Ayni vaqtda o‘zbekistonlik ayollarning o‘zlari qonunni buzgan hollar ham kuzatiladi. Bu asosan hujjatlarni risoladagidek rasmiylashtirmaslik, noqonuniy tarzda ishlash kabi holatlarda ko‘rinadi.
O‘zbek ayollarining fohishalik va qo‘shmachilik kabi ishlar bilan shug‘ullanishi Moskva va Sankt-Peterburgda qayd etilgan.
Ijtimoiy tarmoqlarda o‘zbek ayollarining turli qiyin vaziyatlarga tushib qolgani va turli masalalarda yordam so‘ragan videotasvirlarini ko‘plab uchratish mumkin.
Ayni paytda Rossiyada mehnat muhojirligida bo‘lgan o‘zbekistonlik xotin-qizlarning soni yarim milliondan oshgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
