Markaziy bank ichki valyuta bozorining 2021-yil holati bo‘yicha qisqacha sharhini e’lon qildi.

Unga ko‘ra, ichki valyuta bozori 2021-yilda chet el valyutasiga bo‘lgan talabning ortishi hamda qulay tashqi bozor kon’yunkturasi va iqtisodiy o‘sishning yuqori ko‘rsatkichlari fonida taklifning ham o‘sishi bilan xarakterlangan.

Jumladan, Ichki valyuta bozorida chet el valyutasiga bo‘lgan talabning umumiy hajmi 2021 yilda 26,1 mlrd. AQSh dollarini tashkil etib, 2019 va 2020-yillarning tegishli davrlariga nisbatan mos ravishda 1,7 va 1,3 barobarga oshdi.

Shundan yuridik shaxslar tomonidan chet el valyutasiga bo‘lgan talab 2021-yilda 2020-yilga (15,4 mlrd. AQSh doll.) nisbatan 40 foizga o‘sib, 21,5 mlrd. AQSh dollarini tashkil etdi.

2021-yil mobaynida jismoniy shaxslar tomonidan tijorat banklariga sotilgan chet el valyutasi miqdori esa 7,1 mlrd. AQSh dollarini tashkil etib, avvalgi yilga nisbatan 1,5 barobarga oshdi (2020-yilda - 4,6 mlrd. AQSh doll.).

Shu bilan birga, jismoniy shaxslarga 4,6 mlrd. AQSh dollari sotildi hamda ushbu ko‘rsatkich o‘tgan yilga nisbatan 12 foizga o‘sdi (2020-yilda - 4,1 mlrd. AQSh doll.).

• Markaziy bank