2022-yil g‘alla hosili uchun minimal narxlar belgilandi. Bu haqda Qishloq xo‘jaligi vazirligi Matbuot xizmati maʼlum qilmoqda.

Qayd etilishicha, vazirlik hamda O‘zbekiston fermer, dehqon xo‘jaliklari va tomorqa yer egalari kengashi jahon bozori hamda mintaqaviy birjalar narxlarini tahlil qilib, 1 tonna g‘alla hosili uchun kutilayotgan minimal narx 3 mln so‘m bo‘lishi haqida eʼlon qildi.

Vazirlik bergan maʼlumotga ko‘ra, bozorlardagi narxlardan kelib chiqqan holda har chorakda kutilayotgan minimal narxga tuzatishlar kiritilib, ommaviy axborot vositalari orqali eʼlon qilinadi.

Maʼlumot uchun, 2020-yil 6-martdagi “G‘alla yetishtirish, xarid qilish va sotishga bozor tamoyillarini keng joriy etish chora-tadbirlari to‘g‘risida”gi Prezident qaroriga muvofiq Qishloq xo‘jaligi vazirligi hamda O‘zbekiston fermer, dehqon xo‘jaliklari va tomorqa yer egalari kengashiga jahon bozori, mintaqaviy birjalar narxlarini tahlil qilgan holda kelgusi yil g‘alla hosili uchun kutilayotgan minimal narxlarni eʼlon qilish hamda bozorlardagi narxlardan kelib chiqib, har chorakda ushbu narxga tuzatishlar kiritib, ommaviy axborot vositalarida eʼlon qilib borish vazifasi yuklatilgan.

• G'alla
• qishloq_xo‘jaligi