Joriy yil may oyiga qadar tegishli vazirlik va idoralar “Yangi O‘zbekiston – raqobatbardosh mahsulotlar yurti” dasturi asosida 200 ta eksportchilarni qo‘shimcha qo‘llab-quvvatlash va ularni rag‘batlantirish tizimiga oid Hukumat qarorini ishlab chiqadilar.

2022-2026-yillarga mo‘ljallangan Taraqqiyot strategiyasi loyihasiga ko‘ra, “Yangi O‘zbekiston – raqobatbardosh mahsulotlar yurti” g‘oyasi asosida 200 ta eksportchi ochiq tanlov asosida saralab olinadi. Ular yetakchi eksportyorlarga aylantiriladi va har tomonlama qo‘llab-quvvatlanadi.

Mazkur eksportchi korxonalar ro‘yxati 2022-yilning avgustiga qadar shakllantiriladi.

Ishlab chiqiladigan Hukumat qarori loyihasida esa mazkur eksportchi korxonalarning ishlab chiqarishdan xorijiy xaridorgacha bo‘lgan jarayonidagi muammolarini doimiiy ravishda bartaraf etib borish, sentyabr oyiga qadar eksportchi korxonalarni malakasini oshirish maqsadida yetuk xorijiy mutaxassislarni jalb etgan holda “Eksportchilar maktabi”ni tashkil etish hamda har yili respublikaning har bir hududidan eng salohiyatli 100 ta mahalliy korxonalarni tashqi bozorlarga chiqishiga yo‘l ochib berish maqsadida “tadbirkordan – eksportchigacha” tamoyili asosida har bir korxona uchun alohida dastur ishlab chiqish kabi masalalar o‘rin oladi.

• Eksport
• Loyiha