Hisob palatasi 2022-yil uchun Davlat byudjeti loyihasi bo‘yicha o‘z xulosasini berdi. 

Hisob palatasi xulosasida Byudjetnomadagi barcha byudjet tashkilotlarida (ta’lim va sog‘liqni saqlash muassasalaridan tashqari) ishlaydigan xodimlarni moddiy rag‘batlantirish maxsus jamg‘armasini bir xil 10 foiz miqdorida shakllantirishni nazarda tutuvchi bandiga nisbatan e’tiroz bildirilgan.

Mazkur hujjatda bu tartib byudjet muassasalarida ishlovchi xodimlar real daromadlarining har oyda o‘rtacha 250 ming so‘mdan 1,5 mln so‘mgacha kamayishiga olib kelishi aytilgan. 

Hisob palatasi o‘z xulosasini asoslantirish uchun, Byudjetnomada ko‘rsatib o‘tilgan ayrim faktlarni keltirib o‘tadi.

Unga ko‘ra, 2022-yilda byudjet muassasalarida ishlovchi xodimlarning ish haqi indeksasiyasi (7 foiz) kutilayotgan inflyasiya darajasidan (9 foiz) past miqdorda belgilanayotganligi, jismoniy shaxslardan olinadigan mol-mulk solig‘i stavkalari 10 foizga, elektr energiyasi 33 foizga, tabiiy gaz 21 foizga, issiq suv va issiqlik energiyasi 21 foizga, sovuq suv va kanalizasiya 33 foizga oshirilishi kutilmoqda. 

“Shu bois, – deyiladi Hisob palatasi xulosasida – aholining real daromadini tushib ketishini oldini olish maqsadida, byudjet tashkilotlarida xodimlarni (ta’lim va sog‘liqni saqlash muassasalaridan tashqari) moddiy rag‘batlantirish maxsus jamg‘armasini “Byudjet muassasalari va tashkilotlari xodimlarini moddiy rag‘batlantirish maxsus fondi to‘g‘risida”gi Nizomda belgilangan 15 foizdan 10 foizgacha kamaytirish taklifini bekor qilish maqsadga muvofiq”.

• Byudjet
• Kommunal to‘lovlar