2022-yilda O‘zbekiston Respublikasi tovar-xom ashyo birjasining “avtoraqam.uzex.uz” elektron savdo tizimida 304,1 mlrd so‘mlik 118 mingdan ziyod avtoraqamlar shaffof onlayn-auksionlar orqali sotilgan.

Qayd etilishicha, tuzilgan bitta bitimning o‘rtacha qiymati 2,6 mln so‘mni tashkil etgan. Sotilgan avtoraqamlarning 91 foizi jismoniy shaxslar, 9 foizi – yuridik shaxslar tomonidan xarid qilingan. O‘tgan davrda sotilgan avtoraqamlarning eng past bahosi 494,9 ming so‘mni, eng qimmat avtoraqamning qiymati esa – 348,0 mln so‘mni tashkil qilgan.

Raqobatli savdolar natijasida bitimlarning 5 foizi – birinchi toifadagi avtoraqamlar, 8 foizi – ikkinchi, 8 foizi – uchinchi, 11 foizi – to‘rtinchi, 22 foizi – beshinchi va 46 foizi – oltinchi toifa avtoraqamlarga to‘g‘ri kelgan.

Hududlar kesimida eng ko‘p avtoraqamlar Toshkent shahri va Toshkent viloyati (31 foiz) Samarqand va Qashqadaryo (8 foiz), Namangan, Andijon va Surxandaryo (7 foiz), hamda Xorazm (6 foiz) viloyatlarida xarid qilingan.

Qayd etish mumkin, avtoraqamlarni onlayn-auksionlarda sotilishidan kelib tushgan mablag‘larning 80 foizi – O‘zbekiston Respublikasi Davlat budjetiga, 20 foizi – O‘zbekiston Respublikasi Ichki ishlar vazirligining moddiy-texnik bazasini rivojlantirish, xodimlarini moddiy rag‘batlantirish va boshqa xarajatlar maxsus jamg‘armasiga yo‘naltiriladi.

• Auksion
• avtoraqam