O‘zbekiston va Afg‘oniston 2022-yilda o‘zaro elektr energiyasini yetkazib berish bo‘yicha 100 million dollarlik shartnoma imzoladi. Bu haqda Anadolu axborot agentligi mamlakat elektr energiyasini yetkazib beruvchi davlat kompaniyasi Da Afghanistan Breshna Sherkat (DABS)ga tayanib xabar bermoqda.

Shartnoma DABS ijrochi direktori Xafiz Muhammad Amin va “O‘zbekiston milliy elektr tarmoqlari” AJ boshqaruvi raisi Dadajon Isaqulovlar tomonidan imzolangan.

Mazkur kelishuvga ikki kunlik muzokaralardan so‘ng erishilgan. Shartnomaga ko‘ra, O‘zbekiston tomoni joriy yil bo‘yicha jami 2 mlrd kVt/soat (100 million AQSh dollariga teng) bo‘lgan elektr energiyasini yetkazib berishi kerak.

Muloqot davomida DABS delegatsiyasi o‘tgan yili imzolangan “Surxon – Puli-Xumri” elektr uzatish liniyasi loyihasini ham muhokama qilishdi.

Afg‘oniston tomoni O‘zbekiston bilan to‘xtatilgan loyihalar bo‘yicha hamkorlik qilishga va’da berib, loyihalar xavfsizligini ta’minlashga tayyorligini bildirgan.

Qayd etilishicha, Markaziy Osiyoning yagona energetika tizimi Afg‘onistonga faqat O‘zbekiston orqali ulangan. Yagona energiya tizimi mamlakatlarida ishlab chiqarilgan elektr energiyasi faqat O‘zbekistondan eksport qilinishi mumkin.

• Afg‘oniston
• Elektr energiyasi
• O‘zbekiston