2022-yil uchun byudjet loyihasi bo‘yicha “Fuqarolar uchun byudjet” nashri yirik soliq to‘lovchilarning O‘zbekiston Respublikasi davlat byudjet tushumlaridagi ulushi 2022-yil prognozini e’lon qildi.

Byudjet loyihasiga oid nashrning yozishicha, byudjet daromadlari ko‘p jihatdan yirik soliq to‘lovchi korxonalar iqtisodiy holatiga bog‘liq bo‘ladi.

Shu ma’noda nashr 2022-yil uchun eng ko‘p soliq tushumlarini amalga oshiradigan yirik soliq to‘lovchilar top 10taligini va ularning davlat byudjetidagi kutilayotgan ulushlari miqdorini keltirib o‘tadi.

Jumladan, 2022-yilda UzAuto Motors to‘lagan soliqlarining  O‘zbekiston davlat byudjetidagi ulushi 0,73 foizni tashkil qilishi kutilmoqda.
Kompaniyaning bu boradagi ko‘rsatkichi o‘tgan – 2020-yilda 3 foizni tashqil qilgan.

Shuningdek, quyidagi yirik soliq to‘lovchilarning ham kelgusi yil uchun kutilayotgan davlat byudjetiga to‘lanadigan soliqlari miqdorida katta o‘zgarishlar kutilmoqda (soliq tushumlarining yirik soliq to‘lovchilardan tushgan qismiga nisbatan foizda):

–  “Navoiy kon-metallurgiya kombinati” DK – 17,82 foiz (2020-yilda 50 foiz);
–  “Olmaliq kon-metallurgiya kombinati” AJ  – 9,40 foiz (2020-yilda 20 foiz);
–  “O‘ztransgaz” AJ – 1,89 foiz (2020-yilda 8 foiz);
–  “O‘zbekneftgaz” AJ – 1,7 foiz (2020-yilda 7 foiz);
–  “O‘zBAT” AJ QK – 1,5 foiz (2020-yilda 4 foiz).

Ma’lumot uchun, 2020-yil yakunlariga ko‘ra, respublika bo‘yicha soliq tushumlari jami 103,6 trln so‘mni tashkil etib, soliq tushumlarining 65 foizi 836 ta yirik soliq to‘lovchiga to‘g‘ri kelgan.

• Davlat byudjeti
• Soliq
• UzAutoMotors