2022-yildan boshlab har yili “Mirzo Ulug‘bek vorislari” respublika tanlovi o‘tkaziladi. Bu borada Vazirlar Mahkamasining “Iste’dodli yoshlarni qo‘llab-quvvatlash “Ulug‘bek” jamg‘armasi faoliyatini rivojlantirish chora-tadbirlari to‘g‘risida”gi qarori qabul qilindi.

Tanlovni o‘tkazishda:

I bosqich fevral-mart oylarida tuman (shahar)larda o‘tkaziladi va unda eng yuqori natijaga erishgan har bir tuman (shahar)dan 5 nafardan nomzodlar keyingi bosqichga yo‘llanma oladi;

II bosqich aprel oyida Qoraqalpog‘iston Respublikasi, viloyatlar va Toshkent shahrida o‘tkaziladi hamda ularning har biridan eng yuqori natijaga erishgan 20 nafar yosh navbatdagi bosqichga yo‘llanma oladi;

III bosqich may oyida o‘tkaziladi va unda 100 nafar yosh tanlovning respublika bosqichi g‘olibi deb topiladi.

I, II va III bosqichlar g‘oliblari tegishlicha BHMning 5, 10 va 20 baravari miqdorida bir martalik pul mukofoti va diplom bilan taqdirlanadi. Respublika bosqichi g‘oliblari Jamg‘arma tomonidan tashkil etiladigan maqsadli o‘quv kurslarida bepul tahsil olish imkoniyatiga ega bo‘ladi.

Tanlovda ishtirok etish istagida bo‘lgan yoshlardan, O‘zbekiston fuqarosi bo‘lishi, aniq bir g‘oya yoki loyihaga ega bo‘lishi hamda IQ test natijasi 110 balldan past bo‘lmasligi talab qilinadi.   

Shuningdek, qaror bilan “Iste’dodli yoshlar axborotnomasi” ilmiy-amaliy elektron jurnali hamda “Mirzo Ulug‘bek vorislari” elektron portali tashkil etiladi. Portalda iste’dodli yoshlarning elektron bazasi shakllantiriladi, o‘quv kurslari bitiruvchilarining reytingi joriy etilib, innovasion g‘oyalari va ilmiy-texnik ishlanmalari baholab boriladi.

• Yoshlar
• tanlov