Hukumat “Toshkent shahar transporti va yo‘l-transport infratuzilmasini

2025-yilgacha rivojlantirish konsepsiyasini tasdiqlash to‘g‘risida”gi qarori loyihasini e’lon qildi.

Unga ko‘ra, 2025-yilgacha Toshkent ko‘chalarida harakatlanuvchi 1000dan ortiq avtobuslar xarid qilinadi.

Hujjat loyihasiga ko‘ra, Toshkent shahar jamoat transporti harakat tarkibini 2022-2030-yillarda yangilash dasturini ishlab chiqishda xarid qilinadigan avtobuslarning zamonaviy bo‘lishiga, siqilgan tabiiy gaz va/yoki elektr quvvatida ishlaydigan dvigatellar bilan jihozlanganligiga, nogironligi bo‘lgan shaxslarni tashishga mo‘ljallanganligiga (apparelning mavjudligi), konditsioner, avtobus salonida bekatlarni va yo‘nalishlarni ko‘rsatib turuvchi yozma va ovozli e’lon qilib boradigan elektron tablolar, avtomat uzatish qutisi, xavfsizlikni ta’minlash maqsadida videokuzatuv kameralari, yo‘lkira haqini avtomatlashtirilgan to‘lov tizimi yordamida amalga oshirish uchun validatorlar bilan va boshqa qulayliklar bilan jihozlanganligiga e’tibor qaratilgan.

Shunga ko‘ra, “Toshshahartransxizmat” aksiyadorlik jamiyati korxonalari harakat tarkibini 2022-2025-yillarda 1 043 dona, shu jumladan 190 dona katta sig‘imli (12 metrlik) siqilgan tabiiy gazda, 200 dona o‘rta sig‘imli (8,5-9 metrlik) dizel yoqilg‘isida, 600 dona katta sig‘imli (12 metrlik) va 53 dona o‘ta katta sig‘imli (18 metrlik) elektr quvvatida ishlaydigan avtobuslarni xarid qilish yo‘li bilan yangilash dasturini amalga oshirish belgilangan.

Ma’lumot uchun, 2021-yil 9-iyundagi Hukumat farmoyishi bilan Iqlim o‘zgarishining O‘zbekistondagi oqibatlarini yumshatish bo‘yicha qisqa (2021-2023-yillar) va o‘rta (2023-2025-yillar) muddatli chora-tadbirlariga asosan 300 dona shahar “yashil” avtobuslari sotib olinishi hamda yangi to‘rt turdagi yo‘nalishlar tarmog‘i joriy etilishi munosabati bilan magistral yo‘nalishlarda tasarruf etilishi uchun 63 dona o‘ta katta sig‘imli (18 metrlik) gaz yoqilg‘isidagi avtobuslarning xaridi belgilangan.

• Avtobus
• Loyiha
• Toshkent