“Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi Prezident farmoni loyihasida, jumladan, mahalliy davlat hokimiyati organlari faoliyatining institusional asoslarini zamon talablariga moslashtirish masalasi ham ko‘tarilgan.

Unga ko‘ra, mazkur muddat oralig‘ida mahalliy ijro hokimiyati organlari demokratik tamoyillar asosida shakllantiriladi, shu jumladan hokimlarni saylash tizimini joriy etishning huquqiy asoslari yaratiladi.

Joylardagi masalalarni hal etishda mahalliy hokimliklarning moliyaviy imkoniyatlari yanada kengaytiriladi va har bir vazifa
ijrosi, shuningdek, sarflanayotgan mablag‘lar yuzasidan ularning jamoatchilik oldidagi hisobdorligi oshiriladi.

Mahalliy davlat hokimiyati organlari tomonidan hududiy ijro organlarining shtat birligi va tuzilmalarini belgilash amaliyoti bosqichma-bosqich kengaytiriladi, hududlarda amalga oshiriladigan vazifalar bo‘yicha “vakolatlar reyestri” shakllantiriladi.

Shuningdek, mahalliy boshqaruv faoliyatiga axborot-texnologiyalarni keng joriy qilish, hududlarning 40 dan ortiq, jumladan transport, infratuzilma, ijtimoiy va boshqa sohalar bo‘yicha ma’lumotlarni jamlovchi tahliliy geoportallarini ishga tushirish ham ko‘zda tutilmoda.

• Farg‘ona
• Loyiha
• hokim