Hukumat qarori bilan “Yoshlarning o‘quv markazlarida xorijiy tillarni o‘qish xarajatlari bir qismi uchun subsidiya ajratish tartibi to‘g‘risida”gi nizom tasdiqlandi.

Nizomga ko‘ra, “2+6” dasturi belgilangan xorijiy tillarni bilish bo‘yicha ballning (darajaning) kamida minimal ko‘rsatkichli sertifikatiga ega bo‘lgan ariza beruvchi o‘quv markazi tomonidan unga xorijiy tilni o‘qitish xizmati ko‘rsatilganda, dastlabki 2 oy uchun o‘qish xarajati o‘z hisobidan to‘lanadi, keyingi 6 oygacha bo‘lgan muddat uchun esa Yoshlar ishlari agentligining Yoshlarga oid davlat siyosatini qo‘llab-quvvatlash jamg‘armasi mablag‘lari doirasida subsidiya ajratiladi.

“2+6” dasturiga muvofiq, yoshlarga har oy yakuni bo‘yicha quyidagi miqdorda subsidiya ajratiladi:

– Toshkent shahrida – BHMning 2 baravarigacha;

– Qoraqalpog‘iston Respublikasi va viloyatlar markazlarida – BHMning 1,5 baravarigacha;

– Tuman (shahar)larda – BHMning 1 baravarigacha.

Agentlik tomonidan 2025–2026-yillarda o‘quv markazlarida xorijiy tillarni o‘rganadigan 20 ming nafargacha, 2031-yilga qadar esa har yili 20 ming nafargacha yoshlarga o‘qish xarajatlari uchun subsidiya ajratiladi.

Bunda tegishli yilda subsidiya ajratilgan yoshlar soni 20 ming nafardan oshgan taqdirda, o‘sha yil uchun subsidiya ajratish keyingi yilga qadar to‘xtatiladi.

Ariza beruvchilarning xorijiy tilni o‘qitish xarajati uchun subsidiya faqat quyidagi talablarga javob beruvchi o‘quv markazlariga ajratiladi:

– O‘quv markazi belgilangan tartibda elektron platforma orqali ro‘yxatdan o‘tgan bo‘lishi;

– Ariza beruvchilarning mashg‘ulotlarda qatnashishini kunlik elektron nazorat qilish imkonini beruvchi elektron platformaga integratsiya qilingan bo‘lishi.

Shundagina “2+6” dasturi doirasida subsidiya ajratiladi.

• Hukumat
• Qaror
• subsidiya