Kecha, 15-dekabr kuni Buxoro, Namangan va Xorazm viloyatlarida umumiy quvvati 500 MVt bo‘lgan 3 ta quyosh fotoelektr stansiyasini qurish va ulardan foydalanish bo‘yicha o‘tkazilgan tender tanlovlarida g‘olib investorlar aniqlandi.

Mazkur loyiha Xalqaro moliya korporasiyasi ko‘magida “umumiy quvvati 1000 MVt bo‘lgan quyosh fotoyelektr stansiyalar qurish loyihalarini ishlab chiqish va maslaxat xizmatlarini ko‘rsatish Dasturi” (“IFC Scaling Solar program”) doirasida amalga oshirilmoqda.

3-bosqichda Buxoro, Namangan va Xorazm viloyatlarida umumiy quvvati 500 MVt bo‘lgan 3 ta quyosh fotoelektr stansiyalarini qurish loyihasi amalga oshirilgan.

Mazkur loyiha bo‘yicha tenderning 1-bosqichi (RFQ) 2021-yil 31-avgustda o‘tkazilib, undan 11 ta xalqaro kompaniya muvaffaqiyatli o‘tdigan. 2-bosqich (RFP) esa 2022-yil 11-noyabrda yakunlanib, 11 ta kompaniya orasidan 4 ta kompaniya belgilangan muddatgacha takliflarini taqdim etgan. Bular:

1. “Abu Dhabi Future Energy Company” – “Masdar” (BAA) – 3 ta loyihaga;
2. “Alarko Holding AS” (Turkiya) – o‘rta va kichik loyihaga;
3. “GD Power” – “Powerchina” konsorsiumi (Xitoy) - 3 ta loyihaga;
4. “Voltalia SA” (Fransiya) – kichik loyihaga.

“Ushbu loyiha O‘zbekiston hukumati tomonidan xususiy moliyalashtiriladigan va boshqariladigan qayta tiklanuvchi energetika loyihalarini rivojlantirish orqali yashil energiya ishlab chiqarishni ko‘paytirishga qaratilgan sa’y-harakatlarning bir qismidir. Shuningdek, bu mamlakatimizga aholi manfaatlari uchun energiya manbalari narxlarini pasaytirish, qazib olinadigan yoqilg‘iga qaramligini kamaytirish va energiya ishlab chiqarishda atmosferaga zararli chiqindilarni kamaytirish bo‘yicha umumiy maqsadlarimizga erishishga xizmat qiladi”, – dedi Energetika vaziri Jo‘rabek Mirzamahmudov tender tanlovida g‘olib investorlarni aniqlashga bag‘ishlangan marosimda.

Moliya vaziri Temur Ishmetovga ko‘ra, avvallari davlat byudjeti yoki davlat qarzi hisobiga qurilayotgan elektr stansiyalar so‘nggi-yillarda xususiy mablag‘lar hisobiga qurilmoqda. 2022 – 2026-yillarga mo‘ljallangan Yangi O‘zbekistonning taraqqiyot strategiyasida DXSH tamoyillari asosida 14 mlrd. dollarlik loyihalarni, jumladan energetika sohasida 3,2 mlrd. dollarlik 9 ta loyihalar amalga oshirilishi ko‘zda tutilgan. 2023-yilda yana ikkita loyiha – quyosh va shamol stansiyalari bo‘yicha tenderlar yakunlanishi kutilmoqda. Ushbu loyihalar taraqqiyot strategiyasi hayotga izchil tatbiq etilayotganini anglatadi".

Tanlov natijalariga ko‘ra:

“Masdar” kompaniyasi Buxoro viloyatida 250 MVt quvvatga ega loyiha uchun ishlab chiqarilgan bir kilovatt-soat elektr energiyasini 3,044 AQSH syenti miqdorida taklifi bilan g‘olib deb topildi.

“GD Power-Powerchina” konsorsiumi Namangan viloyatida 150 MVt quvvatga ega loyiha uchun ishlab chiqarilgan bir kilovatt-soat elektr energiyasini 4,828 AQSH syentida yetkazib berish taklifi bilan g‘olib, deb topildi.

“Voltalia SA” kompaniyasi Xorazm viloyatida 100 MVt quvvatga ega loyiha uchun ishlab chiqarilgan bir kilovatt-soat elektr energiyasini 2,888 AQSH syentida yetkazib berish taklifi bilan g‘olib deb topildi.

Gʻolib bo‘lgan investorlar quyosh fotoyelektr stansiyalarini loyihalash, moliyalashtirish, qurish, foydalanish va texnik xizmat ko‘rsatish bilan shug‘ullanadi.

Gʻoliblar bilan davlat-xususiy sheriklik to‘g‘risidagi va davlat tomonidan qo‘llab-quvvatlash to‘g‘risidagi bitimlarni 2023-yilning 1-choragida imzolash va qurilish ishlarini 2023-yilning 4-choragida boshlash xamda 2024-yilning 4-choragida ushbu stansiyalarni ishga tushirish rejalashtirilgan va muhokamalar davom ettiriladi.

• Elektr energiyasi
• Energetika_vazirligi
• Investitsiya
• Moliya