Saudiya arabistoni malikasi, marhum qirol Saudning kenja qizi malika Basma bint Saud 3 yillik mahkumlikdan keyin ozodlikka chiqdi. Bu haqida malikaning huquqiy masalalar boʻyicha maslahatchisi Anri Estraman maʼlum qilgan.

Basma bint Saud bilan birga uning qizi Suxud al-Sharif ham ozod qilingan. Qiz onasi bilan birga 6 yanvar kuni Jidda shahridagi uyi tomon yoʻl olgan.

Malika Basma 2019-yilning mart oyida Shveytsariyaga uchib ketish vaqtida qoʻlga olingan va 3 yil mobaynida mahkumlikda saqlangan. Oʻtgan yillar davomida unga nisbatan hech qanday rasmiy ayblov qoʻyilmagan.

Malika Basma Saudiya Arabistonidagi konstitutsiyaviy islohotlar tarafdori boʻlgan. U Gʻarbda ulgʻaygan va shu yerda tahsil olgan, keyinchalik biznes bilan shugʻullanishni boshlagan, ajrimga oid qonunlarga oʻzgartirishlar kiritish, Saudiya Arabistonida yashovchi ayollarning huquqlarini himoya qilishga uringan. Mamlakatning Yamandagi harbiy kampaniyasiga qarshi chiqqan.

Malikaning aynan nima sababdan qamoqqa olingani maʼlum emas. U 2021-yilning aprel oyida Saudiya qiroli hamda valiahd shahzodaga murojaat yoʻllab, salomatligi bilan bogʻliq muammolar mavjud ekani tufayli uni ozod etishlarini soʻragan.

• Dunyo
• Jahon