Toshkent viloyatida 30 000 AQSh dollari evaziga Amerika elchixonasidan “VISA” olib berishini aytgan firibgar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamentning matbuot xizmati xabar berdi.

Qayd etilishicha, Bosh prokuratura huzuridagi Departamentning Yuqorichirchiq tuman bo‘limi tomonidan DXX xodimlari bilan hamkorlikda tezkor tadbir o‘tkazilgan.

Ushbu tadbir davomida, fuqaro J.O. fuqaro A.ning ishonchiga kirib, go‘yoki Amerika Qo‘shma Shtatlari elchixonasida ishlovchi tanishlari orqali 30 000 AQSh dollari evaziga unga chet davlatga chiqish huquqini beruvchi “VISA” hujjatlarini tayyorlab berishini aytib, oldindan 10 000 AQSh dollarini olgan vaqtida ashyoviy dalillar bilan ushlangan.

Xabarga ko‘ra, mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

• Departament
• Prokuratura
• Visa
• Yuqori Chirchiq