Gretsiyaning Krit orolida erkin kurash boʻyicha oʻsmirlar oʻrtasida xalqaro turnir boʻlib oʻtdi. Bu haqda “Olamsport.com” xabar berdi.

Qayd etilishicha, musobaqada Respublika olimpiya zaxiralari kollejining sport kurashlari boʻlimida tahsil olayotgan oʻzbekistonlik yosh erkin kurashchilar — Amirxon va Hojixon Karimov, Abdulloh Mashrabov, Yakkakurash sport turlariga ixtisoslashtirilgan bolalar-oʻsmirlar sport maktabi tarbiyalanuvchilari Shohruh Raimov va Ozodbek Ozodbekov ham muvaffaqiyatli ishtirok etishdi.

Keltirilishicha, kecha yosh kurashchilarimiz Gretsiyaning, Krit orolida yakuniga yetgan xalqaro turnirda 5 ta medalga ega chiqishgan. Musobaqada Karimovlar finalga yetib kelishgan va anʼanaga koʻra, final bellashuvi oʻtkazilmagan. Hojixon Karimov oltin, Amirxon esa kumush medalni oʻziniki qilib olgan. Bundan tashqari, Shohruh Raimov va Ozodbek Ozodbekov oltin, Abdulloh Mashrabov kumush medalni qoʻlga kiritgan.

Taʼkidlanishicha, Sanjar Mashrabov shogirdlari bir hafta avval Polshada ham shohsupaga koʻtarilishgan.U yerda ham egizak Karimovlar bitta vaznda qatnashib, finalga yetib kelishgan.

Odatga koʻra esa aka-ukalar finalda bir-birlariga qarshi gilamga chiqishmagan va shunchaki oltin va kumush medallarni boʻlishib olishgan. Shu bilan birga Shohruh Raimov va Ozodbek Ozodbekov kumush, Abdulloh Mashrabov esa bronza medaliga sazovor boʻlgan.

• Sport