“Yuksalish” umummilliy harakati har yili may oyi avvalida O‘zbekistonda ko‘tariladigan mavzu – “9-may – Xotira va qadrlash kuni” sanasini qay tartibda nishonlash masalasida o‘z fikrlari bilan bo‘lishdi.

Harakatning taʼkidicha, har yili may oyi boshlarida turli rasmiy va norasmiy doiralarda ushbu kunni siyosiylashtirishga bo‘lgan harakatlar kuzatiladi va bunda “O‘zbekiston uchun 9 may qanday chuqur qadriyatlarni aks ettirishini xalqaro hamjamiyat tushunishi kerak”.

“Yuksalish” mazkur sananing ahamiyati haqida so‘z yuritar ekan, Ikkinchi jahon urushida ishtirok etgan va halok bo‘lgan o‘zbekistonliklar, O‘zbekistonga ko‘chirilgan bolalar va fashizm ustida erishilgan g‘alaba xususida to‘xtaladi.

“Birinchidan, ushbu kunda insoniyat tarixidagi eng dahshatli va qonli Ikkinchi jahon urushida halok bo‘lgan yarim milliondan ziyod o‘zbekistonliklarning ruhi xotirlanadi.

Ikkinchidan, 9-may — urushda qatnashgan 1,5 milliondan ortiq vatandoshimizning jasoratini, front hududlaridan O‘zbekistonga ko‘chirilgan bir millionga yaqin oila va bolalarni qabul qilgan  xalqimizning bag‘rikengligini anglash va qadrlash kuni.

Uchinchidan, bu kunda Jahon urushidan oldin va keyingi tariximizda Vatanimiz tinchligi va ravnaqi uchun jonini fido qilgan barcha ajdodlarimiz xotirlanadi. Hayot bo‘lganlariga esa hurmat va ehtirom ko‘rsatiladi, qo‘llab-quvvatlash choralari ko‘riladi”, – deyiladi Harakat munosabatida.

Harakat, shuningdek, mazkur sanani ortiqcha siyosiylashtirmaslik,  andozalashtirishga berilmaslik, vazmin va jamiyatimiz qadriyatlariga tayangan holda nishonlashga chaqirmoqda.

• 9-may
• Munosabat
• Yuksalish