Adliya xorij valyutasini “qora bozor”da almashtirgan deputat Rasul Kusherbayevni tanqid qildi.

“Qonunchilik palatasi deputati qonunni buzishga targ‘ib qilsa, jamiyat kimga ergashadi? Qonunlarga tanlab-tanlab rioya qilinmaydi”, – demoqda vazirlik.

Deputat bir muddat oldin dam olish kunlarida banklardagi valyuta ayirboshlash shoxobchalarining ishlamasligini tanqid qilib, shu sabab o‘z ehtiyojini “qora bozor” orqali qondirganini aytgan edi. 

“Biz yo hamma tan oladigan va bajarishi majburiy bo‘lgan qonun va qoidalar asosida yashaymiz, yoki har kim o‘z bilganicha, o‘z o‘lchovi bilan belgilab olgan qoidalari bilan yashaydi.

Ming yillar davomida shakllangan sivilizasiyalar qonun ustuvorligisiz yashab va rivojlanib bo‘lmasligini allaqachon tushunib yetgan. Shuning uchun jamiyatlar barchaga majburiy, qulaymi yoki noqulay – qat’iy nazar, umumjamiyat uchun o‘rnatilgan qonun-qoidalar asosida boshqarilib, rivojlanib kelgan”, – deydi vazirlikning mazkur holatga munosabatida.

Shuningdek, Adliya vazirligi xabarda ko‘tarilgan muammo hayotda uchrayotganini inkor etmasligini, ammo uning aynan huquqiy tomoniga alohida e’tibor qilinishi lozimligini ta’kidlaydi. 

Adliya vazirligi Kusherbayevning amalda va o‘z kuchida bo‘lgan O‘zbekiston qonunlarini buzishga qaratilgan namoyishkorona harakatlarni qattiq qoralaydi.

“O‘zbekiston hududida belgilangan yuqoridagi qoidalar va qonun talablari kimgadir qulayligi yoki qulay emasligi, yoqishi yoki yoqmasligi, uning fikridan, qarashlaridan va ijtimoiy maqomidan yoxud haftaning qaysi kuni ekanligidan qat’i nazar bajarilishi majburiydir.
O‘zbekistonda huquqiy ong va madaniyat, qonun ustuvorligini ta’minlash va huquqiy davlat qurish bo‘yicha jamiyat birlashib, shu maqsadlar sari intilib yashab kelmoqda”, – deyiladi vazirlik munosabatida.

Shuningdek, vazirlik deputat o‘z xatti-harakati bilan fuqarolarni qonunlarga ochiqdan-ochiq bo‘ysunmaslik, inkor etishga chorlaganlikda ayblaydi. 

“Kusherbayev o‘z vakolatlari doirasida masalani tizimli hal qilish maqsadida tegishli so‘rov bilan mutasaddi idoralarga murojaat etishi, qonunlarga o‘zgartirish bo‘yicha tashabbus bilan chiqishi ham mumkin edi”, – deyiladi munosabatda.

Eslatib o‘tamiz, valyuta qimmatliklarini qonunga xilof ravishda olish yoki o‘tkazganlik uchun Ma’muriy javobgarlik to‘g‘risidagi kodeksning 170-moddasida javobgarlik belgilangan.

• Deputat
• Kurs_valyuta
• Markaziy bank