Xabardor.uz intervyu dasturining galdagi suhbatdoshi 18 yosh havaskor rassom va talaba hamyurtimiz Kamronbek Bohodirov bo‘ldi. Kamronbek o‘zi hali yosh bo‘lishiga qaramay shaxsiy hayoti va ijodida salmoqli natijalarga erishib ulgurgan. U 2021-yil dunyodagi eng yirik dasturiy ta‘minotchilardan biri bo‘lmish “Adobe, Inc.” bilan shartnoma imzolab, ularga o‘zi chizgan rasmlardan bir nechtasiga foydalanish huquqini bergan. 

- Assalomu alaykum Kamronbek sizni dasturimizda xush ko‘rdik. O‘zingizni qanday tanishtirasiz?

- Men Kamronbek Bohodirov 18 yoshdaman va rassomchilikka qiziqaman. Asosan qalam, flamester va bo‘yoqlar bilan ishlayman va portret yo‘nalishida ijod qilishni yoqtiraman. Film, serial va musiqadan ilhomlanaman va buning natijasida ijod namunalarimni kashf qilaman. 

- Aslida sizni rassomchilikka kim qiziqtirgan yoki bu sohada faoliyat yuritishingizga kim turtki bo‘lgan?

- Men bolaligimdan rasm chizishga qiziqaman. Bobom arxitektor bo‘lganlar va u kishi menga rangli qalam, flamaster hamda noodatiy qog‘ozlar sotib olib berar edilar. Shu bilan birga bobom menga inson yuz tuzilish strukturaviy chizmasidan va ranglarning qanday bo‘yalishidan ham saboq berganlar.  Bundan tashqari men hech qayerda ushbu soha bo‘yicha tahsil olmaganman. Men rasm chizishni o‘zim mustaqil internetdan va boshqa manbalardan izlanishlar natijasida o‘rganganman. 

- Siz 2021-yil dunyodagi eng yirik dasturiy ta‘minotchilardan biri bo‘lmish “Adobe, Inc.” bilan shartnoma imzolab, ularga o‘zingiz chizgan rasmlardan bir nechtasiga foydalanish huquqini bergansiz, shundaymi?

- 2021-yil 30-iyul kuni AQShlik qo‘shiqchi Billie Eilish o‘zining yangi albomini taqdim qilgan. Bu jarajonda dunyodagi eng yirik dasturiy ta‘minotchilardan biri bo‘lmish “Adobe, Inc.” Billie Eilish bilan hamkorlik qilgan. 1-sentyabr kuni esa Adobe menga rasmiy xat bilan murojaat qilib, men chizgan Billie Eilish suratidan tijoriy maqsadda foydalanish huquqini so‘radi. Men albatta rozi bo‘ldim va buning uchun yetarlicha haq ham to‘lashdi. 

- Hozirgi kunda aksariyat yoshlarimiz ijtimoiy tarmoqlar va telefon hamda internetdan foydalanishga “mukkasidan ketgan”. Siz ham shundaylardanmisiz va bunga munosabatingiz qanday?

- To‘g‘ri zamonaviy o‘sib kelayotgan yosh avlod telefondan ko‘p foydalanishadi. Ba‘zilar bundan manfaatli foydalanishsa, ba‘zilar esa zerikkanidan ijtimoiy tarmoqlarni kuzatib qandaydir ma‘noda qoniqish hosil qiladi. O‘zim ham internetdan faol foydalanuvchiman.

- Kelajakdagi rejalaringiz qanday va rassomchilikni o‘zingizga kasb qilib olmoqchimiz?

- Men hozir Toshkentdagi Singapur menejmentni rivojlantirish instituti talabasiman. Kelajakdagi faoliyatimni iqtisodiyot yo‘nalishida davom ettirmoqchiman. Rassomchilik esa mening qiziqqan mashg‘ulotim bo‘lib qoladi. 

                                                                                                                  Olimjon Hasanov suhbatlashdi.

• Intervyu