“O‘zbekkosmos” agentligi ishchi guruhi Fransiya Oliy aeronavtika va kosmonavtika institutiga tashrif buyurdi.

Uchrashuv davomida Fransiya tomoni institut haqida taqdimot o‘tkazdi. Institut aerokosmik sohada kadrlar tayyorlash bo‘yicha asosiy universitet hisoblanib, dunyoda etakchilardan biridir. Institut 15 fakultet, 1900 talaba va 23 patentga ega. Institut tomonidan Fransiya Milliy kosmik tadqiqotlar markazi (CNES), “Airbus”, “Thales”, “Ariane Group” kabi kompaniyalar va tashkilotlar bilan hamkorlik aloqalari o‘rnatilgan.

Uchrashuv davomida “Kosmik xizmatlar va ilovalar” magistratura dasturi bilan tanishildi. Dastur 6 oy akademik taʼlim va 6 oy ilg‘or kosmik kompaniyalarda amaliyot o‘tashni qamrab oladi. Dasturda kosmik tizimlar, Erni masofadan zondlash, sunʼiy yo‘ldoshli aloqa, sunʼiy yo‘ldoshli navigatsiya va kosmik xizmatlar va ilovalar yo‘nalishlarida o‘qitiladi. Mazkur magistrlik dasturiga 2022-2023 o‘quv yillari uchun o‘zbekistonlik talabalarni yuborish masalasi yuzasidan 5 nafar talaba uchun kvota ajratish, hamda operativ tarzda tanlov o‘tkazish va moliyalashtirish masalalarini hal etishda hamkorlikda ishlash masalasi kelishib olindi.

Bundan tashqari, agentlik xodimlari uchun 1-3 oy muddatli malaka oshirish dasturlarini tashkil etish masalasi muhokama qilindi hamda mazkur dastur ustida hamkorlikda ishlashga kelishib olindi.

• Fransiya
• Hamkorbank
• O‘zbekiston
• O‘zbekkosmos